يا طرفه هيّجتيني=بألحانك ولّعتيني
شوّقني صوت الرازم=فوق جروحي زدتيني

قلبي ذايب من بونه=من ليعاته و فنونه
يلعي فرقى مضنونه=ليتك ما ذكّرتيني

فن الحب و منحاته=تتلف روحي ونّاته
وتهيّجني شلاّته=من وجدي تهمل عيني

عذّبني حب فوادي=ما ياخذني بالجادي
يا طرفه حالي غادي=مالي حد يباكيني

يبكي قلبي مضنونه=بوحيّات مقرونه
تعجبني نظرة لونه=والمنطوق يسلّيني

ما يسلي قلبي عنّه=خذني واتعبني فنّه
جرحي وأعواقي منّه=ليت الخل يداويني

دوايه بين شفاته=ريجه ما احلى مزّاته
يشفي القلب وعلاّته=من بسماته يحييني

تحييني نظرة شوقي=خلّي وهو معلوقي
من شوفه تحيى عروقي=وافرح يوم يلاقيني

لجلج قلبي بفنوني=هايم و آجر ألحوني
يالعذّال وخلّوني=مابا حد يحاكيني

لو يحكي لي مضنوني=كان اعواقي بتهوني
يا طرفه لا تلوموني=بّما ياني يكفيني