يا طير يلّي في الهوى لك توجويج=أرّقتني لاحلّك الله حلّي
يا طير بسّك م الولع والتهجهيج=ذكّرتني بأيام عصرٍ مضن لي
وشل حل بك من حادث الدهر والظيج=تلعي طرب لوبك حزن مستعلّي
قال الهوى شوّق فوادي تشوّيج=العي على فنّي واغنّي تسلّي
قلت افتريت ولو حدث لك تعاويج=ما شط بك فن الشجر و الأثلّي
أنته مريح وفي غصونٍ مواريج=من ذا إلى ذا وين تبغي تحلّي
شو بك منوّع بالمثل و الترنّيج=رفرف ولي هب الصبا لك يملّي
مشتاك في روض الفيا والمشاريج=والقيظ في ظل الأثل مستظلّي
خل الهوى يجرح قلوب العشاشيج=مثلي و مثل اللّي حبيبه مولّي
أنا من الفرقا دموعي مهاريج=ضايع و متبايع على بعد خلّي
الجادل اللّي غرّق القلب تغريج=اللّي بقاصي مهجتي له محلّي
حبّه سطى لي في الحشا و المعاليج=وادعى دموعي من عيوني تهلّي
وارمانيه من لحظ عينه مزاريج=وخلاّ فوادي من لحظته يٌغلّي
بو حاجبينٍ في جبينه معاويج=كالنون والا شبه قوس الأهلّي
ينسف على متنه عقوصٍ مطاليج=والخشم سيفٍ من جبينه انسلّي
وخدود عفر ناعماتٍ مباريج=مع وجنتينٍ شبه وردٍ متلّي
والصدر ياضي دون دل و تزهليج=ونّهود جعدٍ شلّن الثوب شلّي
نابي ردوف وله خصورٍ مخافيج=عيصٍ على اخشابٍ كما الطوق خلّي
يمشي دجر دوس اجدمه بالترفّيج=وطرق الزجنجل في اجدامه محلّي
والله عن وصله فلا اهيع ولا ليج=صدّه يعوّجني وشوفه شفاً لي
خذني بحبّه عن جميع المخاليج=وتيّم غرامي يوم هو معطفٍ لي
ياما سقاني من لما مزّة الريج=عذبٍ تسلسل من شفاةٍ عسلّي
وياما تلاقينا وحنّا مشافيج=أنا مبشٍّ له و هو مشفجٍ لي
وياما تعاطينا عهود و مواثيج=لاخون في عهده ولا هو يزلّي
واليوم عن وصله دروبي مغاليج=ماحد منكم يا رفاقه فطن لي
أنوح من هجره واصفّج تصفّيج=وآقول من بيقول يا مير قلّي
ايثيبني لو بالحكي والمهاريج=ويدلّني على الصواب المدلّي
تكفون وانتوا فاهمين المناطيج=يا اهل الوفا خصّيتكم بمعنى لي
ماخص حد و حد فيكم تفرّيج=بالعون ثيبوني على مزملٍ لي
والختم صلّوا عد ما يلعب الكيج=واعداد ما هبّت شمالٍ وشلّي
على نبيٍ خصّه الله بتحجيج=يلّي على دين الهدى به نصلّي