يا طير سلّم على الاصحاب و الخلاّن=أهلي القلي والعرب ذيلاك من دونه
يلّي عليهم تماثيلٍ من الغزلان=منهم صويب الحشا والروح مطعونه
فيهم غزالٍ يساوي قرّة الاعيان=ظبي يشابه ربايا قفر بينونه
مجدّله جانياً ضافي على الامتان=والخد برّاق والحيّات مقرونه
والعين عين الوحش لي برّقت بأنسان=يصطاب منها و للدختر يشلّونه
عذب الثنايا واللما ينعش العطشان=من ذاقهن ينتعش لو ما يداوونه
والعنق عنق الدماني بالحلايا زان=والصدر بشباش قطنٍ قبل يسدونه
عليه لا خوخ لا تفّاح لا رمّان=نهدين تشبه على الزيتون في غصونه
خصره نحيل و من ثقل الردف تعبان=وان ثار مجفي ردوفٍ له يتلّونه
والساق مدمايٍ وعويده عويد لبان=ويلي مشى بالتقف يمشي على هونه
ربى عن هجير القيظ في بارد النجيان=في منزلٍ كل العرب ما يدّلونه
يا طير صوبه تعنّى واقصده بعرفان=راعي الجديل الذي طايح على متونه
قل له ترى حالتي من كثرة الهجران=حالة يتيمٍ مهيّت ما يوالونه
دمعي على الخد كنّه وابلٍ هتّان=يذرف كما الغيث لي يهطل من مزونه
آون ونّات مدرك من كثر الاحزان=وآبث حزني لعلاّمٍ يبعدونه
واللّي شراتي مولّع في هوى الخلاّن=بالعون يحتاج له ناسٍ يعزّونه
أنا غريم الهوى بحبيّبي ولهان=والشوق علّل فوادي لا تلومونه
من شطّه الحب صابه لاعج الهفّان=شطّه غرامه يا علي هجر مظنونه
قلبي غدا في المحبّه محسن وغيلان=واتلى البريمي الذي بالوصف يطرونه
وانا مثلهم متيّم في الهوى غرقان=طبعان وارجو من الله خالجي عونه