يا علي لو شفت ريمٍ شايفنّه=فوق مشرافٍ زمامه معتلي
كان ذبت وزدت النوح ونّه=وابتليت وصرت من عقلك خلي
يا علي توّه غرير صغير سنّه=خشف ريمٍ يرتعي روس الفلي
نور وجهه مثل نور البدر كنّه=والميّدل كالظلام المسدلي
فوق خده مثل ما فوع السمنّه=والشفايا دامياتٍ ذبّلي
زمّة نهوده على صدره زهنّه=جاعداتٍ مثل بيض البلبلي
وان عطى الجافي ردوفه يثلجنّه=والمضمّر خافجٍ ومعزّلي
مثل عود الموز يلّي تاه فنّه=تايهٍ متمايحٍ متمايلي
لي يشوفه قال ذا من حور جنّه=يسلب العشاق وهو مجبلي
بيني و بينه حزومٍ بيعدنّه=رابيٍ في بر روحه مختلي
يا علي جيته مسلّم زايرنّه=وابتليت منه بعوقٍ مدملي
سرت باصيده وصاد القلب كنّه=واجترح لفواد جرحٍ داخلي
والهوى و الحب عند الناس سنّه=والذي مجروح لازم يبتلي
والعذارى كم غيري لتهنّه=صوّبن قلبه و تم معلّلي
آه يا من في هواهن عذّبنّه=وابتلنّه مثل بلوى الغافلي
زاهن لقلبي و لفواد سرقنّه=وملكنّه ملك عبدٍ زنجلي
شيب عيني من تصاويب المظنّه=صابني ما صاب محسن الاوّلي
شطّني من شط حبّه كاتمنّه=في فوادي له محل و منزلي
والله انّي حين ما قفّيت عنّه=كادني لفراق منّه يا علي
بالتعطّف والسلام موادعنّه=ناظري ما حف دمعه يسبلي