يا محل الجود يا نجل الفهود=يا من اسمه شاع في كل الأنام
يا حليف المجد يا زاكي الجدود=يا جزيل الفضل يا نجل الكرام
يا من بفعله مع الناس محمود=يا خليفه يا ابن زايد يا إمام
دامك المعبود في خير وسعود=لا بلاك الله بسوّ وانتقام
واحتماك الله عن شر الحسود=يعل ربّي يحفظك دوم الدوام
يا حمى التالي ويا موفي العهود=لك سلامٍ في سلامٍِ في سلام
عد ما غنّن على الحبلين خود=واهتفن بالصوت شروات الحمام
مع تحيّاتٍ شذاهن دهن عود=به عبير المسك مختومٍ ختام
من نديمٍ من محبٍ لك ودود=واستمع منّه تفاصيل الكلام
إنت سيدي وانت ذخري في الوجود=وانت فيك آمالنا فوق المرام
وانت لي من شيمتك مرضي الوفود=فضل كفّك مرويٍ كل الحيام
وانت مالك في الملا حدّ ندود=انتسبت المجد من خال وعمام
يشهد المعبود والعالم شهود=أن عنك بعيد هرجات الملام
سامياً عند الثريا بلا عمود=واسمك السامي سما باعلى الغمام
بك تعيش عمان يا ولد الأسود=واسفرت بالنور من عقب الظلام
واكتست ديباجةٍ خضر الورود=وارتعت فيها المهايا والأرام
واحتم باحماك بجيوش وجنود=واحتفال شعوب من حامٍ وسام
من حرام العين لي خاري الحدود=مدّوا الكهرب موزّع بانتظام
واصحبت لمويجعي بنتٍ عنود=بالفرح ترفل على روس العلام
كل من في حيّها يمشي صعود=مامنٍ بحماك عن ولد الخصام
من أمانك نامت العين الرمود=وانكبت من هيبتك ولد الحرام
من سما بالمجد لزم انّه يسود=ومن عمل إحسان يجزى باحترام
والختم صلّوا عدد صوت الرعود=(( ع )) النبي المختار شفّاع الأنام