يا نديبي شد علكومٍ كظوم=عيدهيّه للسرى عجلٍ هميم
حرّةٍ جثما الرغا ما هي زغوم=لي بها شت النيا يازم لميم
حايلٍ ما همّلت وقت السموم=ما رزم حاشي تحتها بالرزيم
الشحم في ضلعها سوّا ردوم=قيضت في روض مفلاها طعيم
راسها ما ينحني غير مخزوم=ما يقاوي راسها غير الصريم
من تحس اللمس قامت به تزوم=تمطي خطام الشعر لو هو بريم
ما عليها غير منسوج الرقوم=ساحه وخريٍ مع الياعد نعيم
لي سرت تطوري الفيافي والحزوم=تقطع البيدا وتدني بالصميم
كنّها حرّ دوا من بعد حوم=أو كما نجمٍ دوا راس الرجيم
يطرب لها البال لي جت باتقوم=من غواها كنّها فحل الظليم
وان بغيت تسير عنّي يا شغموم=إستمع منّي وصاتي كن حليم
سر عليها طارشي وقت السلوم=وانت للبيدا دليلٍ في العتيم
خذ كتابي يوم عنّي باتشوم=واوصل الشاعر محمد بو جسيم
النديم الشامسي واعطه علوم=من نديمٍ له على الكايد نديم
بلّغه خطّ مشمّع ومختوم=والتحيّه بلّغه يعله سليم
حيث لنّه لي رفيج وباللّزوم=إذكره ما ينّسى الشهم الكريم
قال له الجمري مصّوب بالسهوم=في فواده جرح محظي البريم
ذابحنّه ذبح مدقوق الوشوم=ناهبنّه من وداده مستهيم
بو جبينٍ كالبدر بين النجوم=والجدايل يشبهن ليلٍ بهيم
والوجه شمسٍ تجلّت من غيوم=والحواجب كنّهن خطّات ميم
وان تبسّم عن ثنايا كالرقوم=والشفايا يشفن الحال السجيم
جاعد النهدين والخصر مهظوم=قدّه الميّاس لي هب النسيم
والله انّي من تجافيه محموم=آنس عظامي تواقد بالصليم
ناظري عاف الكريما ذاق نوم=عيشتي ظنكا وشربي من حميم
أشهد ان الحب جبّارٍ ظلوم=صاحبه تعبان دومه مستليم
وش حياتي يوم انا منه محروم=صد بي ودعانيه مثل اليتيم
ثيبني (( يا )) الشامسي يعلك تدوم=شوفني قلبي معنّا به غريم
لنّ شعرك مثل سيلٍ من غيوم=أو كما شط الفرات المستقيم
والف صلّى الله على طه الرحوم=عد ما هب الصبا شرتا النسيم