قصيدة ( يا نديبي )
الشاعر : سالم محمد الجمري

يا نديبي شد لي حمرا وبر=عيدهيّه للكلف جثما سمين
حرّةٍ منجوبةٍ حدبا ظهر=من ربايا عمان عسمات اليدين
عنقها كالقوس محناي الوتر=تمطي الميدول بين الراحتين
حلوة قبالٍ يداجلها الدجر=ليّنات عضودها والمنكبين
كنّها فحل الظليم اذا نفر=أو غزالٍ ذيّره زولٍ يبين
أو كما حرٍ من الجو انحدر=واصطفق للصيد في ساعه وحين
لي وطت تنفر جلاميد الحجر=ما يعديّها قرا سيح وبطين
كنّها دالوب لمح كالبصر=أو كما نجمٍ دوى راس اللعين
ما رعت سيح الشعيب ولا غفر=ولا ربت في حي ناسٍ ممحلين
رابيه في الساعدي ولها مقر=روضيةٍ خضرا عشبها ما يشين
ربعت عقب المقيظ من الدجر=تتلي روس الشروف النايفين
ما ولاها واحدٍ حظّه قشر=والردي ما صوّع بها في عطين
كنّها بنتٍ تربّت في خدر=من غواها كل ما منها يزين
هاتها يا طارشي واسمع الامر=وامتثل منّي وصاتي كن فطين
شد كورك في ظهرها بالمير=واكرب بطانك عليها لا يلين
لا تثجّلها تحمّلها وزر=غير نسجٍ فاخرٍ لونه حسين
خرجٍ وجاعد قذيلاته سمر=والمحاجب لي تعجب الناظرين
ثم دلّه مع معاميل النجر=والقناد ينبّه المصوّعين
سر عليها طارشي وقت السحر=من دبي و سير سير الياسرين
سنّد بها بالسوى خل الوعر=واضبط مسيرك جنوبٍ لليمين
ع العوير ودوس نزوه والفجر=عندك جبال السميني بيّنين
جنّب يديّه عليها لا تمر=ولا طوي لمضاحيه صوبه تلين
هبّها بالفاو واصعد بالكبر=واقطع الرمله وخذها بالبطين
حثّها عن لا توردّها الهير=هاتها شرقي صدير الواردين
يومها كلّه نهارك والعصر=إنت في دار الكرام الطيّبين
سادتي أهل المعالي و الفخر=ملتقى الضيفان زبن الجانيين
ثم تخّبر من بعد واخذ الخبر=عن مقام اصحابنا لمقدّمين
اشعرا لبلاد واهل المختصر=لي بميدان الشعر متفنّنين
سالم الشاعر وعنده من حضر=الفهاما واخويانا الناعمين
ومعيوف المستمي ما ينحجر=شاعرٍ ولنا خويّ من سنين
كلّهم عندي عزاز لهم قدر=فاهمين وفي المعاني دارسين
خصّهم منّي تحيّه يا بشر=عد ما مالت فروع الياسمين
أو عدد ما جاد نفناف المطر=وانبتت لآراض من زهرٍ حسين
عقب ذا بلّغ رئيس المحتضر=بن وقيش الشاعر الفهم الفطين
بلّغه منّي سلامٍ له أغر=عد ما شدّوا المطايا زايرين
ثم قل له وش بدالك م الأمر؟=في مسبّتنا ونحنا غافلين
كان زلّينا ترانا نعتذر=وكان مخطينٍ فنحنا ماشيين
ما نحيد انّا سعينا له بشر=لا حشاما نعترف نسي بشين
والكلام اللّي رمسته ما غتر=سجّلوه وبلّغوه السامعين
ما يشق الثوب إلا م القهر=ولا تحرج النار إلا الحافيين
يا شعرا في ذا المثل عيدوا نظر=واحكموا بالحق ما بين الثنين
كل خطابٍ له جواب وله فسر=وكل جرحٍ له دوا يا عارفين
يا فهاما عالجوا هذا الكسر=وانتوا لحل المشاكل فاهمين
قبل لا يازم فتر وآخر شبر=ما يفيد الشق رفي الرافيين
غير كان انّه بعد ما يفتكر=نحن دون نفوسنا متوبّلين
والشعر وديان شروات البحر=كلّنا في وسط لجّه غايصين
تم قولي وارتجي منكم خبر=ياهل المايوب كونوا سامحين
والختم صلّوا على خير البشر=سيّد الكونين خير المرسلين


قصيدة ( شاعر دبي )
رد الشاعر : سالم الكاس

مرحبا بقول المعنى لي اشتهر=لي تمثّل واشهره للسامعين
إنتقى لخيار من ربعة بشر=وم الأصايل شد نفيا المرفقين
نلتقيها بالكرامه والقدر=بالمعاني والترحّب سايرين
خذت للطارش علومه والخبر=وافتهمنا كل ما قال الذهين
شاعرٍ في دبي له وقت ودهر=ينتسب الامثال في دنيا ودين
يشتكي ويحتدّ ويطامي بحر=ويطلب الاحكام ما بين الثنين
كان رمس سلطان علينا غتر=مادرينا لين في ساعه وحين
وشعراً المنزل كثيرين الأمر=بن وقيش وربعنا متخالفين
بانساله عن مقاله والغير=لي حضر بين شعرانا الحاضرين
وآنا يالجمري أبا منك الصبر=لين اراجع لك عضا المجلس الامين
كانه بن وقيش ما جا بالعذر=ولا مشى بالعدل حق الطيّبين
طارشي بيجيك بصافي الخبر=فوق لي من فعلها متنومسين
حايلٍ ما همّلت وقت العسر=ولا بركت بالشد بين الظاعنين
قيّظت في دار يسقيها النهر=في بلاد العين مع لمزارعين
ما يحفّي خفّها دوس الصخر=ولي سرت هيهات مقودها يلين
يا نديبي شدّها وقت النشر=هاتها بدرب القوافل لوّلين
قيّل المرّه وروّح م الظهر=وضوّها أهل القصور النايفين
لي لهم تاريخ في ضد الكفر=اكبتوا كيد النصارى الزايفين
إذبحوهم آل مكتوم و حشر=ذبحةٍ منها تشيب المرضعين
هم هل الطوله وهم أهل النصر=في بلاد دبي هم الحاكمين
طارشي سلّم وخص اهل الفخر=لي لهم كل العشاير خاضعين
ومن بعد سلّم على كل البشر=هل دبي اخواننا لمواطنين
بالتحيّه خصّ÷م بدو وحضر=ساكنين دبي زبن الخايفين
ومن بعد هذا ترى الحكم افتسر=من جواب اهل العدل لمحقّقين
بن وقيش تراه في الدعوى نكر=قال هذا الاّ كلام المغرضين
بانحضره إبهوى والا بجبر=عندكم وانتوا عليكم شاهدين
يشهدوا شروى شهادة بوبكر=يوم كان ويا النبي متخاويين
ومن بعد ذلك بوزّيه الخطر=يحلف لكم بسم خلاّقه يمين
وان حلف بالله يصدق لو فجر=ما عليه الا اعتقاده واليمين
ونحن بانجزيه لي سوّا مكر=شعرا المجلس عليه محوّطين
لين يرضى المدّعي عقب الكدر=والشعرا الليّ وياه مقّربين
شي م لزلاّت هيّن ينغفر=ينسمح راعيه لو قاتل اثنين
وشي م الزلاّت يرفا بالستر=يفتضح راعيه بين الحاضرين
والآدمي لي يخاوي العاثر عثر=يستحق الليّ يخاوي العاثرين
بين كلمة نعم و الخيبه فتر=ما ينال العز خص الخايبين
والمرايل ماتبا عود و صغر=حكمةٍ توهب لبعض المسلمين
والردي لي خاب من حظّه خسر=الله لا يسعد علينا الخايبين
ولي يبا الطولات ما يحسب الخسر=يقبض العليا وهو م الرابحين
والردي بين القبايل ينحجر=عاش لا سمعه ولا علمٍ يبين
بو محمد إنت لك سمت وقدر=عندنا بما ذكرت مرحّبين
نطلبك تسمح الزلّه وتغفر=لا تواخذنا بقول الموشيين
أنا منّي لك بدافع كل شر=بوغنيم ابشر بعزّك يا فطين
بيننا باب الصداقه مستمر=وبالمخوّه واللوازم واجفين
عيدوا الأنظار شوفوا لي خير=بالرضا ربعي عليكم مجبلين
تم هذا الجيل والله مقتدر=ومطّلع ع الكل رب العالمين
والف صلّوا ع النبي صبح و عصر=واذكروا الله خير الراحمين