يا نسيمٍ هب زفزافي=يوم دلهين الملا رقودي
أرقنيه والخلي غافي=ما درى المرتاح بسهودي
كن في صدري جبل قافي=والحشا به نار نمرودي
زاد وجدي من تحسّافي=بايتٍ عاكف على عودي
يا ملا ونّاتي رضافي=دمعتي تذرف على خدودي
من مصابي نحت بالخافي=والهوى بيّح لي سدودي
ما ترحّم بي ولا رافي=ينقر فوادي شرى الدودي
شطّني مملاي الاطرافي=واعتراني منّه صدودي
قلت له يا بو جدل ضافي=يا الظنا يا مالي العودي
إنت لي فايج الاوصافي=نافلٍ عن جملة الخودي
بأعتدال وقد واردافي=وارتضاب و جيد و جعودي
ليش ما تحكم بالانصافي=يالظنا توفي بالوعودي
لو سمحت بوصلك يشافي=علّتي ويخفّف يهودي
قال نجم السعد بأخلافي=وانت حبّك فيه محسودي
ما يساعد حظّك ويافي=بالبخت في يومٍ سعودي
والهوى للصب تلاّفي=لو صبرت الصبر محمودي
قلت من فرط الهوى كافي=ما تحمّل يالغضي زودي
ذبت من تلزيم الاعنافي=طحت بحرٍ ماله بلودي