قصيدة ( يا ونتّي ونات مصطاب )
الشاعر : الشيخ محمد بن راشد آل مكتوم

يا ونّتي ونّات مصطاب=مجروح من حولين عاما
لي سال عن حالي والاسباب=قل له محمد ما يلاما
بي حب لو مر الصخر ذاب=مثل الرصاص ويا اللحاما
خذ العقل منّي والالباب=واصحبت مثل المستهاما
لوّل انا صوّب ولا انصاب=وآصيد شيٍ ما يراما
واليوم أرقى روس لهضاب=وللناس مارد السلاما
غضى الخلي في نومه وطاب=وانا بعد نومي حراما
ماخوذ من تلعات لرقاب=مثل المها والا الأراما
راعي ثمانٍ ذبّل عذاب=وخدٍّ كما برق الغماما
واعيان جتّالات باهداب=يلّي رميهن كالسهاما
أنا بحبّه صرت مصطاب=جرحه جديد ابرى القدامى
بي واحدٍ يحسب له حساب=ماهوب من ظول اليهاما
ما ينوصل دونه ميه باب=ومغلّقٍ مب في المساما
ومن فوقهن ألفين حجّاب=وجبال تشبه ع التهاما
واسباع فيهن تلحق الناب=وجتام طشطاش وظلاما
بيني و بينه بعد وتعاب=سيوح ورمول ومتاما
يرعى الحيا والقفر لي طاب=ولا هو ويا القنّاص لاما
هو السبب ويكون الاسباب=ويلومني وهو الملاما
سلّمت ويلا مالي جواب=وعليّ ما رد السلاما
م دري زعل لومنّه عتاب=والا دلع والا خصاما
والله لو سوّوا لي كتاب=وحروز بيدين العلاما
لا تشوفني في راس محراب=لجله صلاتي والصياما
مثل النجم لي عاد ما غاب=منور وللجبله إماما
يا صاحبي يا ولد الانجاب=جدواك مقصود الكلاما
سلام جدوى كل الاصحاب=وسلام من لجلك دواما


قصيدة ( أهلاً وسهلاً )
رد الشاعر : سالم محمد الجمري

أهلاً وسهلاً حي لكتاب=يا مرحب حي السلاما
رحّبت به ألفين ترحاب=باعداد مانف الغماما
من مولعٍ كانت له اسباب=به حب مدقوق الوشاما
يبكي ويشكي فقد الاحباب=أهل التسلّي والنداما
لي عوّقوه وصار مصطاب=مجبور مجروح بسهاما
في حبّهم غادي ومنذاب=مسكين حاله ما يلاما
الحب للإنسان نهّاب=والشوق يسبي المستهاما
ما به هوى من بالهوى ذاب=معروف مكشوف اللثاما
به غرنجيّ غزّر الناب=واثّر صوابه يا سلاما
ولفٍ عليه ينوح نحّاب=يهتف كما هتف الحماما
يختال يشرف كل مرقاب=ويتوق من غدف الحزاما
دونه سبور وسور وحجاب=أخطار واعثار وعداما
تيّم هواه وغلّق الباب=سلّم ولا رد السلاما
أسمه ثمان ولام باحساب=وحيدٍ نبا منه السناما
هذاك لي خلاّه باعذاب=مولع ويشكي للنداما
ولي ما يلّبي الزقر ما ثاب=ما له على الشكوى مراما
ولي ما يغنّي هوب طرّاب=ما ذاق ليعات الغراما
الانسان له ثلاث نوّاب=نفس وهوى وابليس لاما
يا من سما للمجد كسّاب=يا شيخ يا ولد الإماما
إن كان بك ضدّ من اجناب=إبشر تراني لك حساما
أوصل وانا عندك ولا تهاب=لو كان في ليل الظلاما
كم اجرحن من مولعٍ شاب=قبلك وهام بهن هياما
ألحاظهن ترمي بنشّاب=وثغورهن فيهن مداما
وصدورهن ميدان حرّاب=كم صوّبن ياما وياما
قبلك عزيز الخزرجي غاب=وزيد الجميلي مع جهاما
وانته بعد صابك امّا صاب=غيرك ومثلك ما يلاما
ما يصاد وحشٍ م الزقره يهاب=حذرٍ يحاتي م الملاما
لكن شوبك له على الباب=صيده بزينك وابتساما
حتى ان يازم ريّضٍ راب=يربو كما طير الحماما
بن له قصر في راس مرقاب=وحطّه بعد بأعلى مقاما
تهنى بحبيبك زد الاحباب=وتعيش به عيشة كراما
تمت وصلّوا عد ما طاب=شرتاً لفا بريح الخزاما
على النبي وآله والاصحاب=شفّعانا يوم الزحاما