قصيدة ( ياذا الخوي )
الشاعر : محمد بن راشد آل مكتوم

ياذا الخوي اللّي له اخبار=معنا عزيز الناس تطريه
إسمع مقالي وكل ما صار=في واحدٍ خاب الرجا فيه
يابوا له العذّال الاخبار=يسعون فرقا لي يودّيه
كيف الصديج يصور منكار=وكلٍ على كيفه يساديه
خان العهود وصار غدّار=ويقول عنده لي يسلّيه
يا قلب كان جروحك غزار=لابد من عوقك تغبّيه
إنته حياتك كلّها اخطار=وهو الأطبا باتشافيه
يا زين فينا يوم تختار=لي ما يبانا ما نوديّه
أنكفت منّك و الفكر دار=واليوم يعل الله يهنّيه
لوّل وداده فاعل انكار=أون يوم يمر طاريه
غض الصبا زاهي بالانوار=مثل الظبي لي في مفاليه
يلّي من القنّاص مذيار=موحاش ما يقر النظر فيه
هندي وسندي منهن كثار=وكثر الخشر مالي سنع فيه
يا غير م الدانات لغزار=غالي على الطوّاش يشريه
سود العيون وسيد الامهار=حلوٍ بلا حليٍ يحلّيه
ترف الصبا ونهوده صغار=حتى نعيم اللبس يشريه
لكن حكم الحب جبّار=يبلى بجاهل ما يداريه
والاقدار مالك عنهن حذار=ولنسان لي يكتب له يجيه
شروات حرّ شافك وطار=متملّلٍ من شل راعيه
يحوم فوق ويكسر يسار=ما يرد لو أنك بتدعيه
ياللّي من التلواح مذيار=جنع وشماليّه معاليه
من يضرب الهاجوس وافكار=أمرٍ صدرته ما يمشّيه
أسمه على صم الصخر صار=لي في الجبال يشبّ لاظيه
ما تصفج اليمنى بلا يسار=والبحر ما يشب العشب فيه


قصيدة ( حي لشعار )
رد الشاعر : سالم محمد الجمري

أهلاً وسهلا حي الاشعار=حي الكتاب وحي لي فيه
خطّك لفانا يا حما الدار=وحطّه محبّك فوق عينيه
رحبّت به ترحيب تكرار=ساعة نظرته قمت ألبّيه
حيّه عدد ما هلّت امطار=واعداد وبلٍ سال ياريه
ساعة لفاني منك تذكار=قمت امتثل وادرس معانيه
واعرفت بّما جاري وصار=يا منادمي واللي بتعينه
لنّ الذي سجّل في الاسطار=مولع ويشكي فقد غاليه
والحب له سمتٍ ومقدار=عند عربه واهله تداريه
والخود فيهن شين واخيار=حدّ تبيعه وحد تشريه
إن أقبلن لو هن ورا خدار=جنّك وغرّقهن هوى التيه
وان أدبرن ولّن بالادبار=كم واحدٍ ما فكّرن فيه
من عادة الخفرات الانكار=لنّ الهوى هذي مواديه
يجود فيه الحظ ومرار=يقصر وسعدك ما يوافيه
وان كنت لليعات صبّار=إكتم وسدّك لا تفضّيه
خل العذل واصحاب الاشرار=الانسان ما يرخص بغاليه
إتبع هوى خلّك بالآثار=سر في تقف وارصد مفاليه
كادك تشوفه لو بعد مار=وتناشده وتعرف قاصيه
لابد خلّك عنده اعذار=ينفي الوصل عن حد يطريه
ما انروم نحكم حكم جبّار=والمدّعي غايب وينفيه
قبل استخص العلم باسرار=حتى توضّح لك خوافيه
وإذا صفا لك حلو الاهيار=يحق لك كانك بترضيه
لنّ الحبيب سدوده غزار=حذرٍ وسدّه ما يولّيه
إخذه بلطف وطيب هب عار=وازرع نوال الطيب تجنيه
الطيب مظهر غول م الغار=والزين ما يضيع الهزر فيه
إسمه حديد وحيد هدّار=حكمة صفر له عند راعيه
ما ينرخص به راعي الدار=يا سيّدي عن لا تخلّيه
ضدّع بضد وخلّه يغار=إن كان قصدك باتجازيه
وانته فهيم وراعي افكار=فن الهوى دارس معانيه
والختم صلّوا عد ما سار=ركبٍ وعشى في مغانيه
على نبينا خير الابرار=الهاشمي بالخير نطريه