قصيدة ( يوم الدجا )
الشاعر: محمد بن علي الكوس

يوم الدجا نجومه طوالع مناكيس=وهب الهوى من مطلع التيرلافي
بت بسهر والا الدلاها مناعيس=وانشيت مكنون الشعر م الخوافي
يا طي قلبي يصطدم بالهواجيس=أكظم وعوقي باطن الجوف خافي
لوّل أنا فاهم واعرف التدرّيس=واقرا الهيو وافهم حروف القوافي
واليوم من جملة ربوعٍ مفاليس=وان سلت عن حالي فلا الربع صافي
ما فادني كتب المحو والطلاميس=وحرّات قلبي ما انطفت بالمطافي
بيس بحياتي يا ملا وهكذا بيس=ما بين عذّال الوشاة الروافي
آنوح وألعي واشتكي من فقد ريس=ضنينٍ سلب عقلي وعنّي منافي
فيّ استمع قول العذول المباليس=صدّ وهجر واجفى وهذا تلافي
ألا يا شعرا يا اهل الفكر والتقيّيس=يا مسندي يا حاميين الجوافي
ثيبوا على صبٍّ بداه التوسويس=سهيرٍ مولّع والدلاها غوافي
ثيبوا عسى منكم من يصيب ويجيس=ويرد لي لو بعض شيٍ يكافي
أنا بي هوى خلّ على اسمه فلاديس=ينطق بنون ودال ما هو بخافي
والفٍ وعين معّربات التطلميس=ومنزّهات من الشوابه عوافي
غرٍ نهب عقلي وانا اليوم داميس=حاين وتابوتي على الموج غافي
هوّس على قلبي بحبّه تهوّيس=وبخص وحالي كد بداه الهيافي
فلا دامت ايام المحبّه والتأنيس=يوم المحبّه والقلوب الصوافي
يوم الهوى سامر وشرعه متاريس=نمشي دنق تسبح سفنّا غوافي
تغيّرت مجرى الطبيعه وصبح ليس=عقب الوصل ثم عوّضنيه التجافي
يوم اشتكى خلّي سعوا به جواسيس=أهل الملدّه والرزايا الهوافي
صد وهجرني وابتعد ثم خذ اللّيس=منّي وخلاني كما يقال حافي
دعاني غبين بليعتي وحظّي تعيس=وحبال قلبي ما يرت بالقفافي
وفيكم رددت الشان وبغيركم بيس=وليس يرد مثلي لي وصل هوه شافي
وسوّوا عليّه لو طلب عرش بلقيس=راضي ومنكم بأصدر الحكم وافي
صلّوا عدد ما جن ليل بتعسّيس=واعداد ما لبّوا بوقت الطوافي
وما قال قايلها بطي القراطيس=يا ويل ويلي من حبيبٍ مجافي


قصيدة ( لج الفكر )
رد الشاعر : سالم محمد الجمري

لج الفكر في وسط غبّة بحر قيس=واظهر غريب الدر من لج صافي
رقمٍ من اللولو مقيّس تقيّيس=مازون ومفرّد وعرف القوافي
ردّ على اللّي يشتكي قل تأنيسّ=من هجر خلّ بادره بالتجافي
مسكين حاله م العنا في تعاويس=شطّه هوى بو حاجبينٍ عطافي
الجادل اللّي عن حبيبه خذ الميس=واقفى وبادر صاحبه بانحرافي
خلاّه في حرّه وليعه وتنفيس=يبكي ويشكي من حبيبٍ مجافي
جاني كتابه واضحٍ في التطاريس=ولبّيت له عشرٍ وعشرٍ رضافي
لنّه خوي وصاحبٍ في المراميس=شاعر وعنده مزمل الشعر كافي
لازم نجيبه ونغدي له سواسيس=ونقوم بالواجب مع كل وافي
يابو علي لا تكون في فكر تاييس=كل شيء هيّن والفتق له روافي
سانع لخلك يا اللخو وافتح الكيس=واعطه مطاليبه عسى أنّه يصافي
وازرع نواة الطيب وسط المغاريس=تجنى ثمر من لب نزع الخرافي
والحظ أيامه سعود ومناحيس=كاد البخت ياتي بسعد التوافي
وتمسي ويا مظنون عينك معاريس=ونصبح نهنّي لك بوقت الزفافي
ويعود لك خلّك حسين التلابيس=اللّي نظرته للمولّع تشافي
اللّي ذكرت اسمه مغلّس تغلّيس=نونٍ ودال وعين والألف يافي
دوّرت إسمه في الكتب والقواميس=وكلما حسبت حساب جا بأختلافي
باقول لك كلبين عنده حراريس=وعقرب مع البوّاب تلدغ اللافي
والا في نورٍ مسفرٍ بالحناديس=لكن قاصر والأسم هوب وافي
بالعون ما عندي على العرف تحسيس=أصيب لو ما اصيب ظل اعترافي
وان رد لك خلّك يريد التماريس=لا تباحثه في اللّي مضى لك وطافي
لنّ الغواني تبعهن بالتلمّيس=ما هوب بالشطّه ولا بالكلافي
إن أقبلن جن بالفرح والتنوميس=يمشن حسارا ما عليهن لحافي
وان أدبرن ركبن على غارب ابليس=وقفّن وخلنّك تسقّى أحسافي
كم عاشقٍ في حبّهن كد غدا ليس=شطّه هواهن واعتراه الهفافي
ما اسمعت عن لبنى الذي تلّفت قيس=ومجنون ليلى مات ظامي وحافي
يتبع ظعن ليلى بروس الطوايس=تروى عنه بعض الرواة الوصافي
وانتّه بعد صابك من الحب تمسيس=إصبر ولك ربٍ كريمٍ وشافي
وصلّوا على احمد عد ما شدّوا العيس=واعداد ما لبّوا بوقت الطوافي