كم قلت لك يا ولد لشراف=دار الشرف واحفظ حفاظي
وش لك اتمر ابنصب لسياف=ما تخاف من صيد المعاضي
أومي عليك اقبل ولا تخاف=وتومي علي ابسيف ماضي
وأسير في أمرك ومسعاف=وتسير كله في غياظي
راضي ولو تمشي بلخلاف=وانته بعد لي هوب راضي
هل كيف انا وناتي ارضاف=وانته عليك الضحك هاضي
مع ذا العنا كله ولتلاف=قلبي ابغيرك ما اعتاضي
كلما تلالا نجم زفاف=واذكرتك ازدادت امراضي
عليك دمع العين هتاف=شروات شط النيل فاضي
غبا يبل حتا ويبل قاف=واروى ثرى سبع الأراضي
فيك الملاحه سوت أصناف=حمرا وخضرا في بياضي
وفيك الحسن تضرب به أوصاف=كل حسن بك معترف راضي
لك حاجبين اقران واعطاف=واجفان نعسات أمراضي
ولك خد يخجل بدر لنصاف=نور سليم بلا شواظي
ولك صدغ جنه نوط صراف=عقرب وخال ومهر قاضي
ولك جيد فيه الماي ينشاف=وينخص شربك باللحاظي
ولك صدر به نهدين وقاف=زمن شمم نهضن نهاضي
لا مزهن طفل ولا حاف=قرب الثوم جف انقباضي
ولك مضمر مهضوم لنصاف=حتى الدبي ما له اعتراضي
ياني الجدم يشكي من لزلاف=والزلف من طوله امشاظي=
والساق يشكي ثقل لرداف=جنهن دعاثير الأراضي
يا وليفي كم وعد طاف=وانته امعطل لي اغراضي
اتسير عني مسير لي زاف=واسير لجلك في تغاضي
لك أجر من حج وسعى وطاف=ان قلت لو تجنيع راضي
ما شي أشد من عوق لطراف=الا الهوى عوقه امشاظي
ثوب القناعه لبس لشراف=لا طول فيه ولا انتهاضي
وثوب الطمع ما ينلبس شاف=وايبدل الرفعه انخفاضي
وثوب الستر ممدوح لوصاف=وثوب التكشف شين فاضي
القيظ قفى موسمه طاف=طي الدعن غير الماضي
والشيب دره مازاف=لمخيض ما حافه حماضي
واسهيل نجمه فوق ينشاف=واطفى لواهيب الرماضي
وعقوا من الراحات لمهاف=وغزرت ف لحباب احتفاضي
دش الخريف ولو هوى حاف= خداع جلاب لمراضي
شروات بعض الناس ينعاف=حيسك ايعابيه ابنقاضي
ولجلج جميم السمر والغاف=طير عليه النوح هاضي
بعشوش غاف اشناص والساف=طريج لظعان المقاظي