قصيدة ( ارخصوا لي يا معازيب المسره )
الشاعر : غصاب المنصوري

ارخصوا لي يا معازيب المسره=العزى من خاطري والسد باحي
من شرط شرط ترى له من يصره=حللوا لي وادعوا لي بالمباحي
حافي واتبع ظعنهم بالمثره=وارسمه لو طار بالأرض السماحي
أشهد أن القيظ وزاني بحره=في ليال الصيف وأيام شحاحي
في زمان الصيف لا هوب وحره=تهب م اللي تورده سبع النواحي
ودعوني وسط بر ما تقره=غير لي يرجو من الدنيا نجاحي
ما نظرته غير طرف اليوم مره=يوم جال الخدر عن زين الصباحي
ما عداني لا جزي بالخير شره=من هدب عينه ينكس لي رماحي
لو حلب لي من لبن لي حلو دره=تطعمه كبدي كما دبي القراحي


قصيدة ( بكرتي داست نحس في ومضره )
رد الشاعر : مصبح بن الكندي بن مصبح المرر

بكرتي داست نحس في ومضره=ما تبا تمشي على الدرب السماحي
خطفتني بمنزل مالي برمه=ليتني ما جيت أنا ذاك المراحي
برح دمع العين م العبرة تخره=لين حفي الموق من كثر المشاحي
لي ذكرت اللي معانسته مسره=لي حديثه يجعل المزكوم صاحي
لبقت في الصدر من فرقاه حره=ما يطفيها براد الما القراحي
ولو سقوني من لبن صفرا عفره=تطعمه كبدي كما الوزر النصاحي




المصدر : كتاب أعذب الألفاظ من ذاكرة الحفاظ
جمع وتحقيق حماد الخاطري