الأيام تمضي والليالي تعودها=وشهورها ترسم والأهله عقودها
وسنينها تعقد يلي دار حولها=من دور نوح وعاد وآخر ثمودها
والحي والآمال في معرك البلى=والروح تفنى والمصايب ترودها
إن كنت يا المخلوق راعي بصيرة =إقبض زمام النفس بإيدك وقودها
هي لك من العدوان واثنين غيرها=هواك والشيطان ياخذ سجودها
واختار من الخلان خل مناصح=يبعدك عن نار جحيم وقودها
يأمرك بالتقوى وما حال حولها=ومن صالح الأعمال " شيك " نقودها
دنياك يا لمخلوق عِبرة وعَبرة=واللي عبر ما عاد يوم يعودها
ما عاد للخلاف والأمل والوطن=واختاردون خيار سكنة لحودها
قدم أعمال الخير يا كاسب الثنا=ومن قدم الحسنى تعوض ردودها
ترى الزمن دوار يكشف عن الملا=يعطيك صورة ما خفى من سدودها
والحي في دنيا مقيم ولا درى=ان الحوادث محرقات جنودها
دنيا غرور وما يدوم خيالها=ما ثبتت للحي يوم وعودها
تشن شنات علينا وتنثني=وكم منزل بثت وشلت عمودها
هذي منازلهم وهذي ديارهم=وهذي مجاريهم خليت ركودها
صلاة ربي عد ما ناض بارق=على محمد المبعوث صفوة وجودها




المصدر : كتاب أعذب الألفاظ من ذاكرة الحفاظ
جمع وتحقيق حماد الخاطري