يا الله يا واحد لطيف بخيره=يا عالم النيات ظاهر وخافيه
ندعوه رب ما نشاركه غيره=يا واحد ما حد غيره نواليه
يمحي ذنوب من الخطايا كبيره=داري بمكنون الضماير واقاصيه
يسمع دعا من كان في كل ديره=كل برزقه ما يضان بمعاطيه
ويسمع مشي دوسات نملة صغيره=على الصخر والليل مظلم نواحيه
يفك من همه بليله سميره=بايت سهير الطرف والنوم جافيه
ناجيت من نادى بلجة غزيره=ذو النون في الظلما من الحوت منجيه
علام من رجت أحواله خطيره=عهم وغم والحوادث تباريه
والعبد ماله غير ربه نصيره=واخبار رب العبد للعبد تكفيه
في كل ما تنويه قم واستخيره=عسى إلهك بالسعادة تلاقيه
علام ما ينوي الفتى في ضميره=قبل التلفظ بالثنايا ويطريه
الطيب تظهر له أرياح عبيره=والسو بإسم السو ضده يحاذيه
يبغيك في ذا الوقت تصبح نصيره=تظهر له الغايات وانته تشاكيه
يفرح يلي شاف المصايب مغيره=بالك تظن أن البلايا تخاطيه
يا من يخادن له نفوس شريره=منها يعادي بالمساوي مخاويه
من فاز بالتوفيق ربك نصيره=نصر من المعبود دايم يباريه
طالع وفكر يا خوي البصيره=كان البصر لي عندك الفكر يدنيه
بين الملاحة وبين صافي غديره=في اللون واحد والطعم لي ينافيه
صلاة ربي عد مشرق منيره=يا عالم النيات ظاهر وخافيه




المصدر : كتاب أعذب الألفاظ من ذاكرة الحفاظ
جمع وتحقيق حماد الخاطري