يا ليتنا ما سكنا فوق القليب=ولا عرفنا فريق شد وانزاحي
يا ليتهم هيدوا والمدة قريب=ما شاقهم يوم شدوا بارق لاحي
يا ليتهم يوم شدوا كنت متغيب=كنيت أنا عبرتي والسد ما باحي
با صيح لو صايحي بيكون له ثيب=با صيح لو بايقولون العرب صاحي
عليك ياللي فراقه عوق ويشيب=يا بو ثمان سوى ما هن بطفاحي
يا بو نهيد حفاة الثوب ولبيب=يشبه فناجين صين كتبها ماحي
ويعرف سمت العرب وان قام متحيب=لطف الحشا وان رمس ما هوب نباحي
يقول قلبي وداع الله يا الطيب=من غير كلمة وداع الله ما واحي