طالت مساريحى ونفسي تندمت=كما يندم القنيص لا رد فايل
يغيب الطرب من القلب ويضيق باله=ولكن ما خليت بدع المثايل
تماثيل شعر ما نحن باخلين به=علينا وجوده لي نشد منه سايل
كما ياخذ البياع حاجات بيته=ومن ضم البضايع حط فيها نفايل
وهذي على ما هزت عندي نفيلة=على وليف ذقت منه الغلايل
وأنا بان الذي قد زرت بيبان مكة=حزت الندم والا من الأجر فايل
لك الله يا قلب غدت فيه شكة=يلعوا كما يلعوا حمام الرسايل
وقامت تلوعه بين الاضلاع تكة=كما يلوع القرص حر الملايل
على شخص لي يملكه ما يفكه=ناله بخت غيري وأنا كنت فايل
يا مالكه لي من ملكته فزكه=نصيحة لا يستوى منك زايل
لي كان عندك وانته لي مالكنه=ما عاد لك من فوق بقعا طوايل
ولا ربح لك فيها ولو طولت لك=ولا نلت إلا مثل ما كنت نايل
وأنا نلت في قلبي ذبوح بلا حد=لا لحمة قطعت ولا دم سايل
قمت أتذكر ما مضى واتوجد=توجاد من صكت عليه الحبايل
وأدعو حسدك الله يا صاحب الحسد=في جنة الفردوس عالي المنازل
عقب السفر تميت في ليل أسود=وما قبضته ما درى ويش قايل
خابر بعض الاسلاع يوخذ وينرد=وإلا البعض يأتى الرجا فيه طايل
عيوني تبرق والنظر ما عاد يمتد=بليت بليالي بليا قوايل
يالله ببدر يسفر الليل الاسود=يا معطى عبده خيار الرسائل
أبغي السفر رب إنظري فيه يمتد=أشوف لي بينات فيه الخصايل
وإلا عذابي واكدنه توكد=على صاحب من دونه الله حايل
على صاحب عيا البخت فيه يمتد=عديم جنس ما عينت مثله مثايل
لكنها بالوصف قايد جميلة=تتقدم عليها ناقلين السلايل
كل يحاول في سنعها بحيلة=تجي بالحزوم ولا ترب المسايل
ختلتها ما وكدت لي بزيلة=غير الندم منها فلا كنت نايل
باربي النظر لي بار من بورت التفق=التفق تكذب والنظر كان مايل
ولا نلتها إلا عير على الشفق=تفاخت ويلين من دونها الليل حايل
وخليتها مني الى الصبح يصبح=وايلاها ليالي بليا قوايل
ألا ياليال غاب منها قمرها=علي والحين ما عاد فيها مراجل
وكنه تبين غيرهم لى رماها=أنا اشهد إن ماذي بعندك حمايل
ولاودك انها تبقى الا انساها=ورجالها من فوقها الطعس هايل
وسمحت منهم كأنهم لي رموها=وتستاهل المدحة عيال الحمايل
وش عذرهم يوم إنهم ذيروها=وتعومست نفسي على قول قايل
رمايها لو انهم جنبوها=ولا خير في مدح بليا فعايل
ومن شك في نفسه فلا نال مرجلة=لكن ما غيري عليه بطايل
يشكون فيه الناس بافعال جوده=وزايد على الانذال بأربع خصايل
الأوله يفتي لساني بلا خطا=والثانية قاري كتاب الرسايل
والثالثة كفاف خيري وشري=ولا نيب فاعل سو بين القبايل
والرابعة يا ممتنيني تراني=ترى كل معناة عليها دلايل
لولا بان لي ذا الباب بآكون من حجر=وإلا كنت من ثقل الحديد الثقايل
قمت أتحسف على اللي فاتني واتندم=تندام من ردت عليه النثايل
قام يتندم عقب ما حط في اللحد=على وليف زوله رمس منه زايل
وأنا المقابر زرتها غير عيت=عليك قالت عده فرض ونفايل
واللى قضيت الفرض فاقبل علينا=أنت سوات الطير واحنا الحبايل
والطير لي جاذيك في الحبايل تصيده=ولى صادته ما كان منها بفايل
عان الله على ذيت المقابيح حاصله=ولا نلت هذي من قبلها وعلايل
لو نلتها ما صرت فيه حسايف=ولي مت فأنا من الهم زايل
وذا الحين أنا لي مت بايسمعوني=ومن مر قبري في طريقه يخايل
بعينه وقلبه لا يفاخت مسامعه=يسمع جوابي صوبهم كيف قايل
وصية منى تراني مدبر=وهذا جوابي قبل تبرك رحايل
خطير أنها تبرك ولا يمتدى لي=ولا خط ولا ابدع من صميري مثايل
هذا وصلى الله على محمد=اعداد ما هل من المطر من مخايل