قصيدة ( قلبي تعلل يا بن سرور )
الشاعر : علي بن بطي الضفري

قلبي تعلل يا بن سرور=ذايب ومتلته ومحتار
يفور صدري فور تنور=باطن حشايه مأرث أضرار
دمعي على الأوجان منثور=من الموق شروى نف الامطار
كلما مسحته هاض بالزور=واسقى السهول وعم الاقطار
بي وردتين فوق بلور=على غصن تايه بالأثمار
مشتط أنا والخل مسرور=يمشي فرح وأنا بي أعزار
كنه على صدري جبل طور=ولو حيد ما شله ولا ثار
أرمانيه بأسهام ووتور=كني الطليب ويبغي الثار
ريم ربى في راس مقصور=في مقلة عيوني له أنهار
أسمه على الدلهين مغتور=هشر وثلاثمية في الأسطار
يا سعيد دلنيه على شور=حيدك فهيم وراعي أنظار


قصيدة ( يا مرحبا يا حي مسطور )
رد الشاعر : سعيد بن سرور المزروعي

يا مرحبا يا حي مسطور=أوعد ما ناجوا في الاسحار
أوعد ما بالكون مذكور=أو عد وبل هل بأمطار
يا بو حسن خلوك مأمور=الراميات البيض لاكبار
وتقول متعذب ومهجور=هذا وقلبك يشتعل نار
الغيد مهضومات لخصور=من شأنهن يا صاح لأخطار
قبلك ألوف اعتلوا دهور=ولا قضوا من تبعهن كار
كم واحد تابع هوى الحور=ولا فادته لاحذار وانذار
الصبر حق الصد مذكور=جيد اذا بتكون صبار
واليوم أنا شفني على كور=من فقد خل مشمع الدار
أهواه لو هو صار مذعور=وارضيه لو هو صار مذيار
وإذا تيسم حص لبحور=غض الصبا ونهوده صغار
أسمه معي راقم على سور=اميه وسته غير الأغتار