قصيدة ( ان سلت عني يا علي )
الشاعر : الخليفي بو عويا الشامسي

ان سلت عني يا علي =آزمت م الفرقا خلي
من عقب خلي الأولي=الدرب من صوبه عفي
من العدوه للحسد

يطري عليه واذكره=القلب نابت بثمره
لكن من لمعثره=هذاك لي هو غيره
إجتاز عني وابتعد

البارحة نومي خفيف=من الشفاقة ع الوليف
خايلت براق كثيف=على الرفيعه والغريف
وعلى الفلج هب وسند

فرقا وليفي ممحنه=ما هوب يوم ولا سنه
اشتاق من وصل وطنه =لي ما يغالي في ثمنه
هذاك ما عنده زهد

الزين فايق بمعناه=ما فيه عوف ولا دناه
مثل القمر مسفر سناه=أقول في الدنيا غناه
ساهي ومزموم النهد

قم شد لي بكر نحوف=بلغ سلامي له ولوف
ان ريت لي زين الوصوف=لا فيه منقود وعوف
حص الثنايا كالبرد

يشبه على لون الظبي=ما ريت من مثله وبي
معزل مثل الدبي=ذكروا وصلوا ع النبي
سنه بلا حساب وعدد


قصيدة ( جاني خليفه يشتكي )
رد الشاعر : علي بن رحمة الشامسي

جاني خليفه يشتكي=من هجر خله لاولي
يقول شفني يا علي=ازمت م الفرقا خلي
عقب الصديق اللي مود

قم يا رسولي من حداه=بنرد للشاعر نباه
هات السجلة والدواه=وعرفت قصده ومعناه
واللي حضر معنا شهد

يا حي منظوم الشعر=باعداد ما خط الحبر
يا طارشي دوك الخبر=هياك عجل بالأمر
بلغ سلامي بالعدد

قل له ترانا ما نهاب=نفرح بمردود الجواب
ما نلحق الصاحب عتاب=من القرب وإلا م الجناب
واللي علينا يعتمد

قل له ترانا لك قريب=والظن فينا ما يخيب
ابشر من يرد الطليب=والحق معنا ما يغيب
من يوم جد فوق جد

بيجيك مردود المقال=منظوم جيل في عدال
ولك مستعد بكل حال=بالمال والا بالرجال
عن جارنا ما نستبد

نحنا نرد العايلين=وانداوي القلب الحزين
والله يعين العاشقين=ياللي قبلنا من سنين
تاريخهم معنا يعد

والختم صلوا والسلام=باعداد ما سيل الغمام
واعداد ما صلوا قيام=على النبي سيد الأنام
شفيعنا يوم الوعد