يقول اللي سهير ما ينامي=غدى نومي على عيني حرامي
سهير الليل واراعي النجوم=وسرى م الليل زام بعد زامي
يلج اليوف من زود الهموم=كما لجت على اليد الحيامي
هموم اليوف شيئ من جديد=وشيٍّ له مداهيلٍ اقدامي
افكر في الليالي الماضيات=تقضت مثلما طيف الحلامي
اذا راحت ليالي جت ليالي=كذا الأيام تمضي بالهمامي
بها الأفراح تمضي ماتدوم=وبها الأكدار تسقيك الهيامي
سقاك الله يا وقت الخريف=من السحاب هطّال دوامي
يا حيث انّه مضت لي به ليالي=مع الاكرام زوّار حشامي
وقضينا الوقت اللي تفوت=بافراحٍ.. قلوب ابلا ندامي
ويا ماصار في يوم اجتماع=ملاقات الكرام مع الكرامي
ومع الاجواد توجد كل طيّب=وترحيبٍ لقصّاد الخيامي
تطيب العين من شوفٍ عجيب=تخص اهل الملابيس النعامي
وكل عقب ذا بدل مقام=وانا في الحبس طوّلت المقامي
اذا قزّرت به يوم يطوف=حسبت اليوم عن تقزير عامي
ولي هبّت هبوب البر ريف=نسيمٍ راف ماسوى كتامي
ولو هو باردٍ كنّه مليل=على قلبي وجفني ما ينامي
وباقصى اليوف نشحٍ لي شرا=كما تنشح مسامير اللحامي
أنا مشتاق لاهل البر شوق=كما تشتاق للورد الظوامي
وقلبي صوبهم دايم يتوق=كما توقات طيرٍ حر شامي
ألا يا رايحٍ مني قصاد=عجولٍ فوق قطّاع المظامي
يلي من ديس بتروله وساب=كما سهمٍ زرق من قوس حامي
ولي اقفى يسوّي من وراه=غبارٍ مثل قطّاع الرهامي
يلي جيت الحشام اللي اكرام=عليهم رِد مردود السَّلامي
سلامٍ عد ما هبّت رياح=وعدد ماناض برّاق الغمامي
على اللي مشتكي منّه صواب=وذكره دايمٍ عندي دوامي
عليه القلب ولهانٍ عطوف=سباني الود منّه والغرامي
عديم الوصف بوخصرٍ نحيل=ونهدٍ مثلما بيض الحمامي
وميدولٍ يلي هدّه ودنّق=خطيرٍ منه تاطاه الاقدامي
وعينٍ تجعل العاقل هبيل=دعت لي جرح باقصى اليوف دامي
ثقيل العقل لو سنّه صغير=خجولٍ ما يكثّر م الكلامي
ويعطي الهرج منطوقٍ لطيف=كلامٍ به تأدّب واحترامي
كلامٍ يشتفي منه العليل=دوا الممروض للصّاحي اسقامي
انا قلبي تملّى من غلاه=وبقصى اليوف له عندي مقامي
وعلى المختار في ختم النظام=صلاة الله منّي والسلامي