قصيدة ( يا بن زعل ترى المراجل لها أنواع )
الشاعر : سعيد بن جاسم الرقراقي

يا بن زعل ترى المراجل لها أنواع=متفرقه ما هوب كل يصيبها
حد كسب شبر وحد كسب باع=وحد ولو ظنيت به ما يصيبها
من مد لك بالشبر تجزيه بزراع=وكل ودرب المايله لا يغدي بها
والمرجلة ما هوب تشرى ولا تباع=والمرجلة صعبه وتبغي صعيبها
أوصيك أنا بالدين يا بن من طاع=لا تغرك الدنيا ترى الله يصيبها
وأوصيك أنا بالجار له قدر واسناع=والكلمة اللي تغضبه لا تحكي بها
الضيف رحب به يلي جاك مصطاع=كرامته لي سار عنك يهذي بها
مثايل يا بن زعل صدق وأوقاع=ما قالها إلا صادق معتني بها
ما غرته دنياه في المال طماع=والنفس ما يكتب لها إلا نصيبها
ويا عبيد بيت العز شله من القاع=والهينه يا عبيد لا ترتضي بها
ويا عبيد لا تتبع حكي كل صداع=وانقل عمود البيت وارضف لحيبها
وحذراك من اللي غرته فيك الأطماع=لجادل أصبح شبابه نصيبها
لا والله إلا ظنيه والرجا ضاع=والنفس يوم الحشر الله حسيبها
وقري الكتاب ومن نظر فيه يرتاع=وكل يدور حسنته لي يجيبها
يالله ياللي من ترجاك ما ضاع=يا خالق الدنيا وتعلم بغيبها
تجبر عنا قلب من الضيق ملتاع=وعين تهل ولا يوقف صبيبها
وصدر به الهاجوس نوع على أنواع=يسج لو هو حاجته معتني بها
وصلاة ربي عد ما هل في القاع=على النبي نطش المطر من سكيبها


قصيدة ( أهلا عدد ما هل وبل على القاع )
رد الشاعر : ابنه الأكبر محمد

أهلا عدد ما هل وبل على القاع=وما خلق في الدنيا وراسم كتيبها
برسالة فيها من الجيل ما شاع=وان جا لها صوبي سبب ما التهي بها
مثايل جت من جدى طايل الباع=رجل مجرب كل عسرة يصيبها
عيد الهجن لي جن مزاحيف وضواع=يثنى لأهلها يوم تقبل وحيبها
لي شرفن عقب الطمانه بالأرفاع=وعقب الصلف قد هي تواني خبيبها
منارته كل بها عنده أوقاع=يدعاك في غدرا الليالي لهيبها
تلقى بها خمس وست على أنواع=ودلال رسلان تدافر قريبها
يعمل به بن وهيل إذا فاع=يبري خوى راس الذي ذاق طيبها
شي يصب وشي في النار وضاع=وهذي تحط وذي تجر لشريبها
ونجر يلي من دق كن له تلعلاع=كصوت خلي تلتعي ضاع صيبها
مثلولث كنه على راس مطلاع=تحلابه أرض في القفر ينبني بها
محلته مجلى وملقى ومشراع=وملفى لهشال الخلا مع قريبها
وحلق تقلط حق ذربين الأطلاع=يراقي العليا بعالي هضيبها
أبوي وأنا له على الأمر مطواع=كم ليلة لأمره تحملت شيبها
مشيت له في كل لازم بالأوضاع=أمشي مطيع لكلمته واستجيبها
وإذا زقرني قلت لبيه بأسراع=وما قال طعت لهرجته وارتضي بها
كم كلمة جتني لها صرت جراع=يبداي بها اللي دايم يعتدي بها
كلمة بهيس باهس الهرج جراع=لرضاه ما كني بعارف طبيبها
ولا نيب له في القول لي قال سماع=الواشي اللي كلمته يستعيبها
ولا نيب مغرور وفي المال طماع=والنية اللي خايبة ما انتوي بها
والعالم اللي للمخاليق شفاع=ما قد عصيت بكلمة لي لغي بها
وأني مطيع له على الصدق جراع=واداري ما تنجو يلي جا ذهيبها
ويا من لقلب كن به دق طباع=من كلمة صارت ولا أنا بصحيبها