قصيدة ( حدى الظعن يا عود بينوون )
الشاعر : محمد بن راشد المطروشي

حدى الظعن يا عود بينوون=أهل الثنا والجود مير والأحسان
من بعدهم رحت بعنا الروح محزون=في بحر فكري حاير الجاش ولهان
وازداد ما بي في مصابي وما دون=حالي ولا لي من نشد بين غزلان
إذا لاح لي نور بدى البدر في لون=داج يعيده بين نابي وكثبان
مليح تولى الحسن عن كل مزيون=باهي الجبين بغرتينه والاعيان
غر رمى قوسين نبله ومسنون=تبسم وفي الياقوت در ومرجان
تليع يشيع بمزونه فوق لمتون=وقد رشيق باعتدال ونهدان
تلالا بضيا منه الكواعب يزينون=برونق حسن يوسف وللحسن ديان
غنيج المها منه غريم ومفتون=سباني وبإنسانه وسبا جمع رهبان
تليعت من وهن على ليعتي هون=تقادح بقاصي مهجة القلب نيران
ثم قلت يا هل الدار لي وفد مرهون=في حيكم تايه تزايد به الران
باسالكم بالله وأنتوا تعرفون=لاني سليب مودته وين ما كان
لو ما وداده وابتعاده ومكنون =خافي فلا وليوا من السر تبيان
كلنني حملت ما لا يطيقون =معشار ما بي قاسي الصخر به لان
يا ليت ولاية عليه يمنون=بأحسانهم فيمن سعوا فيه عدوان
وحرمت شوفه كثر خوفه ومصيون=ما لا يطيقه في وزا وهن وأشجان
فلا الطيف ياتي به ولا من يسلون=دونه ولاني سالينه ونسيان
لو ما المخافة من حسود يقولون=ذا مستهام ومغرم بغير برهان
لوامتي لي ما عن الود يشفون=دائي وحكام الهوى دون سلطان
تعد الوفود الوصف فيما يعدون=كيف الذي ناظر شخص حسن وإحسان
خلاف ذا يا طارشي رح ولا تهون=تعنا بنظم مع كتاب وطرسان
واحذر عن اللي في المجالس يهرجون=أكظم سدودك يا نديبي بكتمان
لاجيت دار شف مباني مع حصون=وانصى خليفة معدن الجود والشان
أبو محمد يا لفى كل مزبون=ولد الكريم الشيخ جمهور الأيمان
عرب وذرب زد الاولاد مأمون=بالحلم والتأييد شهم بالأحسان
بلغ سلامي له عدد ما يحجون=يهدى بنفح الطيب روح وريحان
قل له ترى المشغوب بالعبد مغبون=يسال عنكم يا ضفى كل عربان
ادعو لك الباري عن اللي يحسدون=بحق يوسف وموسى وطه ولقمان
تعطى الغني فضلك على كل مديون=تسعد بمال ثم آل و ولدان
يا ولد من بالجود دايم يجودون=تذكارهم في نجد وحايل ونجران
إعذر وسامح للمدح تستحقون=أرجو من الله عالم الغيب سبحان
ربي يديمك بين ناس يضفون=لا خيب اللي جاك ما هوب خسران
وأزكى صلاتي عد من له يصلون=على النبي الهاشمي نسل عدنان


قصيدة ( حييت يا مندوب الأحباب بالعون )
رد الشاعر : عبدالله بن السيد أحمد الهاشمي

حييت يا مندوب الأحباب بالعون=يا مرحبا بك ما همى صوب نعمان
ويا مرحبا بك ما شدى الطير بالحون=وما طاف طيف الليل والجفن وسنان
أضحكت مسرور وابكيت محزون=وبيحت مكنون وذكرت نسيان
حييت يا حاوي لنا كل مضمون=إبداع جيل كنها روض بستان
جيل كما در عن الشين مصيون=تغالي به التجار في غزر الأثمان
لو يحلف الحلاف ما قيل مغبون=ما صاغ معناه الخفي ذهن إنسان
والشعر رده بين الأجواد مسنون=واللي لهم في مذهب الحب عرفان
وأهل الشعر في كل واد يهيمون=ما هام في حب الرعابيب ولهان
لبيك يا داعي المحبين بالهون =عسى لنا ويعود عواد لأظعان
سبيت قلبي من معانيك بفنون=حورية ماست من الحسن بأردان
ولحظ كما سيف من الهند مسنون=لو لا فتور في كلامه والأجفان
بالراح والريحان واللين واللون=يفضح فتيت المسك والرند والبان
شبهت عوده في تثنيه بغصون=فيها نهوده كنها صغار رمان
والنار والأنوار بالخدر والنون=قوس تقوس بالحواجب والأعيان
اخفي بسحر البابلي تحت لجفون=وابذي بحسن اليوسفي بأرض كنعان
وأنا كما قيس الذي هام مجنون=في حب ليلى مفارق طيب الأوطان
كم بت من همه بها الليل مسجون=فلا جزى الله لايمي فيه بأحسان
تلالا بنور منه في حالك الجون=كالبدر في سدف الدياجير قد بان
عذب اللمى يبري ظما كل مفتون=من السلسبيل اللي يشافي من الران
غر وقلبي في معانيه مرهون=سلطان حبه غالب كل سلطان
لو خيل شمر في مجاله يخرون=لو هم سناعيس الملا قيل ذلان
من باع روحه في وصل كل مزيون =أنا أشهد أنه فيه ما هوب خسران
يا عونة الله ما حد فيه لي عون=ما بيننا بالصلح يسعى والأحسان
وخلاف ذا يا راكب كور مأمون=منفية البيطان من بذر ضبيان
مشهورة الأوصاف للي يعرفون=ومشرغة بالطعم في عرسة عمان
هيا ونحرها للفيافي ولحزون=إلى ديرة الأجواد وطوال الأيمان
وأنصى حبيب صافي وميمون=لمحمد المطروش من خير الأخوان
خل شفيق وصفوة اللي يودون=راعي سدود بالمودة وكتمان
بلغ سلامي له عدد ما يصلون=وإعداد ما حجوا إلى البيت ركبان
شكيت لي خل من الناس مضنون=تمادى على الهجران من غير برهان
وافضيت سد طالما كان مخزون=بأقصى ضميرك بين واش وعدوان
ما تسمع العشاق واللي يذكرون=تضرب بهم الأمثال في كل ميدان
يا مطالب الخفرات أصبر على الهون=كما صبر بمطل المعاسير ديان
وختمي صلاة الله على سيد الكون=محمد الهادي عدد كل ما كان