قصيدة ( من آراجع والحكم صادر )
الشاعر : الدكتور مانع سعيد العتيبة

من آراجع والحكم صادر=وافتكر وارجع الشوري
والغضي لي بالحسن نافر=بين خرد او غيد او حوري
باخصني خافي او ظاهر=ما يراعي مول لشعوري
باعني بالبيع لي خاسر=وانا له شاري بلكروري
مع خياله ليلي آساهر=واترقب طيفه ايزوري
يوم لي بيلجي الخاطر=مرة بيكون مشكوري
مبتلني إبحبه القاهر=او مالكني ملك مغروري
وانا لجله في الهوى صابر=لي اينور ليلي إبنوري
إبحياتي دومي امخاطر=كود مني ايصير مسروري
بو خليفه ثيب للشاعر=يا الشهم لي دوم مذكوري
انت ذخري لي بك آكابر=بإجتماع او كل محظوري
أشتكي ما الخل لي ذاير=او ما ايبرت بأسبابه اكسوري


قصيدة ( حي جيل يا من الشاعر )
رد الشاعر : الشيخ زايد بن سلطان آل نهيان

حيّ جيلٍ يا من الشاعر=ساهرٍ ويصوغ في الحوري
محرمنّه خلّه أو قاهر=بالغياب أو ماله احضوري
بالهوى متعنّي أو شاهر=بارعٍ بالزّين مذكوري
سولعيّ الجيد والنّاظر=من جبينه يسفر النّوري
خذ وصاتي مانع أو بادر=بالنّصيحه واتبع الشّورى
بادر لخلّك وله ثابر=بالمودّه لي لها طوري
مخلصٍ له صدق م الخاطر=وابتسم له دوم مسروري
حثّ ياثق منك ما يذاير=وانت شهمٍ مابك اقصوري
لك بيلقى حكمه الصّادر=الغضي مهضوم لحضوري
لي وجد برهانك الظّاهر=خاضعٍ له ابدون منكوري