قصيدة ( يوم اعتليت الجو )
الشاعر : الدكتور مانع سعيد العتيبة

يوم اعتليت الجو=منكف جداك اوضاوي
من فوق مزن النو=قلبي خفق لك هاوي
في اليوف شبت ضو=فيه لهبها كاوي
كم أتمنى لو=تعطف عليه او تاوي
كل مالك ابتغلو=مالك عندي مساوي
أحباب ربعي يو=وانته غادي غلاوي
وقت الطرب يحلو=وانا مازم خلاوي
هم في الهوى اتهنوا=او ما ريت أنا لمداوي
ما أقبل يصيبك سو=عنك احملها البلاوي
يا خل جاوب أو=برفع ضدك دعاوي
صاير شرات البو=قلبي عطيب او خاوي
لي تطلبه في التو=بعطيك عمري ناوي


قصيدة ( سمعت فوق النو )
رد الشاعر : الشيخ زايد بن سلطان آل نهيان

سمعت فوق النّو=جيلٍ امرتّب غاوي
من شاعرٍ به ضوّ=يشكو لهبها كاوي
متصوّبٍ في التّو=مانع وماله امداوي
عالج امحبّك أو=تعطب عليه أو تاوي
شلّه معك للجو=دامك إلشوفه هاوي
لي صحّ لك به لو=عن لا تازم خلاوي
صوب لبلاد إنحو=شروى لعقاب الهاوي
بالسّعد تتهنّوا=عقب الجوّ أو علاوي
وبستان لك يحلو=بالورد لي هو حاوي
عند الغضي واهنو=لي خدّه له سناوي
أو خصرٍ نحيف أو تو=ونهدٍ ابصدره ناوي
عساك تكفى السّو=ويبقى لك بالهناوي