قصيدة ( من خاطري دار الفكر بهواسه )
الشاعر : علي بن روغة

من خاطري دار الفكر بهواسه=وانشيت جيل طاب لي ناموسه
جيل معرب مالقوافي ساسه=مطبوع في بيض الصحف مرموسه
يجلي الكدر مالخاطر وسواسه=ويبش قلب العاشق المهموسه
وازكى المعاني سكرت في اطراسه=منظومه نظم الدرر لي من طوسه
جدوى فهيم من زواكي ناسه=ذلاب او منطوق الفهم محسوسه
مانع شرع فن الشعر واقياسه=يفتي وعارف مجملات ادروسه
ياذا الخوي ضاع القلب كرياسه=انقض ولكن عقدتي محيوسه
من صاحب مخصوص زد اجناسه=بو قامة بين امغتل مغروسه
يحايله ريف الشرق بكواسه=ويفوح من طيب الشذا ملبوسه
والخد يسفر في الدجى واغلاسه=والصدر ناعم كالفرا ملموسه
هذا الحبيب إلي رسا رساسه=وسط الحشا وتمكن بمجلوسه
عليه نفسي دايم حساسه=وترعاه عين المعتلي بحروسه


قصيدة ( حي ابجواب زان به قرطاسه )
رد الشاعر : الدكتور مانع سعيد العتيبة

حي ابجواب زان به قرطاسه=فيه المعاني بينه او مدروسه
حي به عدد ما هب به نسناسه=ما المطلعي واعداد شرتا كوسه
واعداد ما خطه على كراسه=وعداد رمل تحتويه اطعوسه
امن الصديق إلي شكا من ناسه=مستويع دق الخطر ناقوسه
الحب غامر مهجته واحساسه=لين الخطر ولع حمر فانوسه
نفسه جداهم يشتكي حساسه=على جمر حبه غدت محموسه
يا بوحسن سر في الهوى باحماسه=حتى يلو جاسيت من كابوسه
الحب صعب يا الخوي في امراسه=الشهم يصبر لي طلب ناموسه
قبلك انا في الحب ذايق باسه=متمرس في واجبات اطقوسه
الحب شارب من زمان كاسه=قاري سرد واعراب في قاموسه
كله سبب لي نادرات اجناسه=فايع صباه ايميس في ملبوسه
فرد فريد امعطرات انفاسه=حلو أديب لي رمس مرموسه
بين الجواهر هو حجر الماسه=او بين اللآلى دانة منفوسه
مقل الملك مهيوب من جلاسه=له عرش فوقه ايطيب له مجلوسه
نفسي غدت له في الهوى عساسه=من زود حبه جنها مهووسه
حبه إمسيس في فوادي ساسه=او حدايقه وسط الحشا مغروسه