انا محبوس عن كل الأهالي =وصدقاني مع اللي كان غالي
ومنهم جيت في منزل قبيح=بسجنٍ منه يكره كل بالي
وان اصبحت فى سجني مقيم=ومن اجواد العرب كلٍ عنالي
وقدني عارفٍ من لي صديق=ومن قلبه عطوفٍ لاجل حالي
عليّه صار ممنوع الخروج =ومن وصل العرب يا عز تالي
على البيبان اقفالٍ حديد=مفاتيحه لها من كان والي
وباب الشّبك تسهر فيه عسكر=بخضرٍ ممهرات لها مزالي
يطلع من اثاميها رصاص =رصاصٍ يقصر أعمارٍ طوالي
وفي أرقابها حطت حراب =سموم الموت فيها والزوالي
كفى الله شرها كل الصديق =ومن سجنٍ له اسقافٍ عوالي
كذلك تايحات الدهرد ترمي=وفي الدنيا تغدر بك الليالي
تراها كالرحى الدنيا تدور =ولا تسعفك في كل الامالي
ولو تسعفك في بعض الشفوف=كما البنت الطموح بلا عيالي
وشي قدّره ربي عليك=يصيبك لو تتّقا في الجبالي
فقل في وقت ما تسطاب : خيره=ولا تكره بما يعطيك والي
فلا انته عالم بما يكون =ولا الأقدار تمنعها بمالي
ولا يقول المرء أنا مطيع=وعند الله دون الناس غالي
فما يكتب على غيره عليه =كتب له ما يشا خلاّق عالي
ورزقه وين ما يرحل وراه =ولو في كف غيره له نيالي
فلا يقطع نصيب العبد حاسد=ولا ينشيه الا ذا الجلالي
وبين الناس سوى الله حظوظ =وفي لحظوظ من داني وعالي
إلي من جاد حظّك بالسعود =سعدت وصرت من ناسٍ عوالي
ولي من بار بك ضاع الدليل=وعنك السعد نوّى برتحالي
ألا يامن على خلقه رقيب=مجيب دعاي يا سامع سوالي
ويا من خالقٍ دنيا ودين=ويا مهدي عبيده "م" الظلالي
فلا تجعل على ظهري ذنوب=فلا ذنوبي وعفوك بالعدالي
ولو عفوك برمل الارض يوزن=فعفوك زاد عن وزن الرمالي
وإجعل منك لي حظٍ سعيد=وفي دنياي لا تكتب شقالي
ويوم البعث ابعثني شهيد=ولا تعطي كتابي فى شمالي
ألا يا رايحٍ منّي جنوب =يجد السير لاوطان الأهالي
على ما كان "م" الطرز الجديد=يقص البعد سيره باعتجالي
الى من طفت من رقعة صليب =تفتّق لك سواريقٍ سهالي
تنابيك الرمال الواقفات =تبين بالعلا من كل عالي
وتدخل بعد ذلك في قرايا=بطرقٍ من صعود الى نزالي
الى من جيت سلّم بالسلام =على أهلي ومن عنّي يسالي
سلام للكبير وللصغير =على النسوان من بعد الرجالي
وإن سألوك عني يا فهيم=فقل لهم ما شكى من عسر حالي
عسى كل خيّرٍ يجزى بخير=ولا يغتث له فى الوقت بالي
فلابد ان كل شيٍّ يهون =نجيهم فوق منقوش الظلالي
جديد الطرز ممتد الجنوب=اديبٍ ما تعلّم بالحبالي
صلاه الله على طه الرسول=عدد ما ذعذعت ريح الشمالي