ان سلت عن علمي وعن حادثٍ جرى
باخبرك حتى انّك تصير خبير

جينا من الكم (1) الجنوبي من اليوا
في جيب للشركة بوحيب قصير

مرقاع(2) عندي كان فى يومٍ اقشر
وسياره اخرى معاي تسير

خطفنا على رجلٍ يبا السيف قاصد
وعنده صبي من العيال صغير

قال انقلوني يا هل الجود والكرم
تجزون من رب العباد بخير

نقلناه نبغيها لشانه جميله
وعن كلمة الرديان فينا تصير

ركب عندنا وصرنا بجملة ثلاثه
و ولده ركب عنا بموتر غير

عندما مشينا قدر الله بالقضا
وهو على كل الامور قدير

تعرض لنا في الدرب هيلٍ من النقا
وخذنا على طرفٍ واحنا نسير

خذتنا ونحن فيها سريع تقلبّت
كما قلب صخرٍ من الجبال كبير

ثم ادفعت عقب العلاه على الوطى
غدى الرمل من فوق الوجوه نثير

ثم قلت انا لربعي عساكم سوالم
ولاحد فيكم قد شكى تعوير

قد قال لي مرقاع انا كنت سالم
وخوينا شكى عظم الفقار كسير

وانا شكيت العوق من الجنب الايسر
لسعني وجع لكن ليس خطير

وخذنا خوينا اللي كسيرٍ معانا
ونقول عسى ان به طبيب بصير

ومن عقب ما وصل "الدخاتر " توفى
قد حط من فوق النعش بيطير

ومن جهة خذني مدير العساكر
وحبست انا حبس بلا تقدير

لاني بمبسوطٍ على كيف غايتي
ولاني بفي شدّه وقِل الخير

الاجواد توصلني على كل ساعه
والله بكل امّا يصير خبير

عسى انها تالي الامور هواين
ما يعلم الانسان ويش يصير

ما دامها عند والي العرش طيبه
تنجا لو تطبع ببحر غزير

ولا همّنى الا فراق الجماعه
ودارٍ لها دايم معي تذكير

عسى الله يسقيها بحقبٍ شوامخ
تظهر عليها من المغيب عصير

تشاعل بها لبروق من كل جانب
وغدى الليل من لمع البروق منير

تغبّا سماها والشوامخ ترضفت
وسوّى الرعد بين القنوف هدير

ثلاثين ليله يمطر الحسب ما اجتلت
ولا ابعد عن ابواب البيوت غرير

تباشرت به سكنة البدو واصبحت
تروى رواها من شطوط غدير

تلقى غديره عن مغانيه زايد
والسيل سوّى فى الخروم خرير

شتّت به البدوان ترعى اخضاره
وورودها ما مزّرت من بير

ولا تشوف فوق العدّ تنحط زانه
ولا تشوف من عدٍ قطين صدير




(1) الكم : مجمع خاص بالشركات
(2) مرقاع : المقصود به خلفان بن راشد الهاملي مرقاع كنيته