طلبت والمولى رقيب=وتصوخوا هذي عزاه
قم شد لي من الحول شيب=ياللي ذراهن كالجناه
أن زرفلن بتقول ذيب=حلو المرافق والقطاه
يفرجن هم الصويب=أن عاد خله من جداه
ان هب من الياهي صليب=برد رموله عن حفاه
وان لض برق في المغيب=عن لا تباطى جري ماه
من زود سحاب رغيب =أسقى على الزور ونقاه
وجنوب أرك ع العذيب=وطوي حارب جا معداه
في دارهم أصبح غريب=وتباشروابه هل قطاه
وجنوب أدعاها غبيب=من بوظبي طال معداه
وفي شرق تم الا صبيب=وفي الحجر ما تمت حصاه
قيل على مسقط مديب=والعصر روح واحلاه
أسقى على خط النجيب=يجود والممحل سقاه
ع الصور سوى له سكيب=مطراي والحاضر نصاه
شمال ومسوي دعيب=واسقى على حجر البداه
أسقى سلامه والغبيب=والرمس ربه ما نساه
ع الظيت قالوا لي قريب=يدن والبارق لضاه
وأطلبك يا علام غيب=يرد يسقي مع نقاه
على فريقك يا تعيب=سلطان وربوع وياه
وفي دار بو جنب لبيب=من فضل ربه لي عطاه
يهاجره ورد الجليب=والسولعي ربك غناه
والعنبر يزوره جليب=ولا تكاسل في شراه
والراس يحشونه بطيب=كلما نشل عقص طواه
لي ما يداقل ع الجليب=ولا ينسمع نطق محكاه
عساه بو خصر قبيب=حولين ما يقبض رشاه