البارحة في النوم ياما تأذيت=ساهر وجفني ما غضى بالمنامي
من زود ما بالقلب يا هلال ونيت=ونة لذي ماله خوال وعمامي
حد نهض حظه وولع له الليت=وحد بقى في سابل من الظلامي
في غربة مالي صديق بها ريت=وارجو من الله الفرج في الختامي
ربع مشوا في جيب " بكس ، ووانيت "=فجر الخميس وخطفوهن سوامي
عبوهن البنزين ومروينهن زيت=" وأكفار " بألوان الجداد تمامي
ضامن السرعة بطلوا وألزموا " السيت "=وراحوا ربوعي وانتووا بالمشامي
لهم راجي التوفيق من منشي البيت=بوصول مع فرح وخير وسلامي
عن ديرتي ماخذني البعد ونسيت=عنها ولا يخفي قمرها الظلامي
يا حي ربعي من سحب ربي سقيت=بموج تمجه وابلات الغمامي
من الليوا يسقي وشرق إلى الظيت=وجنوب وشمال لين وادي الحمامي
وع البلد لو عنهن بعيد تناييت=دار الرفاقة والذخر والحزامي
من حيث من يقوى ولد عمك قويت=وإن ضعف نال الضد منك المرامي
يا الله غيرك بالرجا ما ترجيت=عز الرئيس وعز ابن العمامي
درع البلد ياللي لها وسعوا صيت=وحموا حماها بماضيات الحسامي
ولاني بناسي طيبها لو تسليت=ملجا الوطن له في السويدا مقامي
طال إصطباري وكم أنا به تمنيت=أوصل ومن بعد السلام الكلامي
واشوف ربع بينهم قد تربيت=طفل قبل لا حط ربط الحزامي
من شوفهم لو كنت مرضان صحيت=وابريت وانجال المرض والسقامي
لربوع مجدي في السجلات عنيت=أزكى سلام فوق مسك الختامي
تمت وفي ختم النهايات صليت=على المصطفى المبعوث للدين حامي