عزي لقلب خالف الشور=ما يستمع شاير ولا مشير
يسري يلي من جن ديجور=يالله توفق له بتيسير
سيرت به لين اختطا السور=ورديت ودموعي مناثير
يوم ان نووا بتجفاه بدبور=كنى معرقب بالكتاتير
قلبي على فرقاه مجبور=مشكاي لله يا بن عمير
ومن قبل لا زوره ولا يزور=أنا بسبع النعم وبخير
ما ينمهر لي كان ممهور=لي عاد سابق له مهر غير
حبك بقلبي فاعل جور=هذا ومنكم شغل تعذير
والا الوصل لي منك يصور=والا العذر يا صاحب الخير
مافي بقايل منكم قصور=مرة بعطا ومرة بمعاذير