طرقت ابواب في حاله ضروره=كما العادات عند العارفينا
وكلٍ لي تفشر في كلامه=وقال ابشر ونحنا حاضرينا
وراحت ساعة الأيام تجري=تمر الشهور تتبعها السنينا
وصارت عندي الدنيا زهيده=وضاقت بي وقل ابيه المعينا
الين الله فرجها عليه=كريمٍ عالم السر الدفينا
وعند الله ما تصعب مصيبه=يسهلها يلي صعبت علينا
وجهت عبيد في يومٍ مبارك=عبيد الجابر الممدوح فينا
عريب الجد له خالٍ مجرب=وله علمٍ يسر السامعينا
يراقي قمة العليا بفعله=ويصعدها بعزمٍ ما يلينا
ويتركها الدنايا لمن بغاها=ويوكر موكر الحر الفطينا
يشوم من الدنا ما يعتني به=وكساب العلا في الأوّلينا
وباب الجود عنده ما يصكّه=ونزهٍ عن دروب المغرضينا
نفعني في مهماتٍ كثيره=وانا مالي عليه اسلاف دينا
ولكن عادة الشيمات تظهر=من أهل المرجلة والطيبينا
ترى الشيمات مخلوقة لاهلها=وتأبى تختلط بالعاثرينا
إذا ضاقت عليك كل النواحي=وعجزت بك هزيل من السمينا
فلا تيأس ووجه الله باقي=ولا تنسي القروم الغانمينا
شرات عبيد كساب الجمايل=كفاه الله شر الحاسدينا
عزيز النفس من بيت المعزه=ومن نسل الكرام السابقينا
وصلى الله على الهادي محمد=شفيع الأولين والآخرينا