قصيدة ( بوظبي دار المعزه قصيدة )
الشاعر عبد الله بن عامر الفلاسي


يا نديبي دن لي "موتر شفر"(1)
من حسين الطرز صنعة ماهرين

من على سيته زها زلّه حمر
لي اشتغل بالروف ما تسمع حنين

المكينه توه "ايلها" (2) خضر
و"التواير"(3) من عطبها سالمين

شيك(4) البترول من شيشه قطر
ورح رعاك الله رب العالمين

يا محمد من قطر امش الظهر
والعصر في بلاد ناسٍ طيبين

بوظبي دار المعزه والنصر
دار شيخانٍ قرومٍ عادلين

ود مكتوبي وعلمي والخبر
صوب احمد بن علي ذرب اليمين

وبلغه مني سلام ومن حضر
مجلسه من الجماعه الطيبين

ثم قله ابن عامر فى عسر
يشتكي لك من هوى صافي الجبين

ويشتكي لك من هوى صافي النحر
بايتٍ ليله يطوح بالونين

خلّفه منه محيديب الظهر
شايبٍ مجرم وقمارٍ لعين

كنه اموكل على عيون البشر
يعله الحمى وحاله ما يزين

حانه المعبود في تالي شهر
"موتر" يدعي عظامه كالطحين

قام يرزح من طمانٍ في وعر
وشمّته ربي جميع الشامتين

لي بغوه يقوم يمشي ما قدر
منكسر عظمه ومهضومٍ حزين

جاته البلوى بأمر والي القدر
وشمتت به قدرته ساعه وحين

جاه من سبع السما نجمٍ حدر
واجعله بالقاع اسفل سافلين

والعقايب صبته صب المطر
داورت به من شمال ومن يمين

قاطعٍ واقطع من سود الجعر
قاطعٍ والله يحين القاطعين

حاذفينه ساجنينه في حفر
أو على القامات حروة اربعين

وعن عيون الناس في بعض الجزر
حاجزينه لامثيب ولا معين

وذا جزا اللي فى النميمه ما غتر
المنافق كم فرق من اثنين

والختم صلوا عدد ودق المطر
"ع" نبي الأولين والآخرين



(1) موتر شفر : نوع من انواع السيارات الامريكية
(2) ايلها : الزيت
(3) التواير : الاطارات
(4) شيك : عبأ واملأ