قصيدة ( قطر ديرة الأشراف )
رد الشاعر أحمد بن علي الكندي
على قصيده بو ظبي دار المعزة
للشاعر عبد الله بن عامرالفلاسي



مرحبا باللي لفانا من قطر
مرحبا بك يا محمد كل حين

مرحبا بك عد ما هلّ المطر
وعد ماراحوا لمكّه زايرين

وعد ما هزّ الهوا عودٍ خضر
وعد ما تجيب الخلوي من الحنين

بالسلام وبالكلام اللي يسر
والنظام اللي كما العقد الثمين

اعتنيته بالمزيد من الفخر
وكل مضمونه عرفته باليقين

هات لي يا عبيد "جمسيك " الحمر
وارد "امريكا " وصنعة شاطرين

ما يعلّم بالحراره لو دبر
منوه اللي باللزم مستعجلين

فيك جيكٍ(1) واربعه ضد الحجر
كامل الاوصاف وسبيره(2) اثنين

والدبل(3) والقير(4) صاحي والنمر
وان غمزت السّلف(5) سواله رطين

نشِّره يا عبيد واغبش من سفر
واتّكل يعلك بحرز الحافظين

فوق لي يقطع سهلها والوعر
مرة ينزو ومراتٍ يلين

وبالسلامه فى قطر قبل الظهر
ديرة الاشراف عز الملتقين

وبلغ المكتوب لي منه حضر
لابن عامر بين ذيك الحاضرين

وبلغه مني كلام المختصر
واشرح القصه وهو "م" العارفين

وكل ما يبغيه مني في الامر
العمر واللي تطاليه اليدين

لو يطرشني بليل بلا قمر
في سنع خلٍ يوده من سنين

مستعد يلو يعرضني خطر
لو نظرت الموت بالله استعين

لين يرجع صاحبه مالي عذر
ويهتني وياه هذاك الخدين

ولا يلام اللي تولع وانجبر
كم تتحمل قلوب العاشقين

كم مُولع في الموده ما صبر
فى شبابه راح عن دنيا ودين

والهوى لو قال من مده وطر
كان كلٍ صار فى حبله مكين

ويعل نقال النميمه "م" البشر
ينقطع ذكره ومنّه سالمين

والف صلى الله على خير البشر
النبي الهادي وسيد المرسلين




(1) جيك : هو اداه تستخدم لرفع السيارة
(2) سبيرة : الاطار الاحتياطي
(3) الدبل : الغيار الاضافي يستخدم في الطرق الرمليه
(4) القير : الغيار العادي
(5) السلف : هو مكان وضع مفتاح تشغيل محرك السيارة