البارحه ماغضت العين بالكرى=والكبد حل ابها الوزى في عمودها
سرى الليل كله والمخاليق نوّمت=وطاب الكرى للي رقد من رقودها
امسيت تلعب بي الهواجيس بالحشا=تلج الحشا لج الظوامي ورودها
يلي فارقتني عبرةٍ جات عبره=سرى بين الاضلاع الحنايا وقودها
كما النار وان شبت على راس ما علا=وزغاها الهوى في عاليٍ من ندودها
أعوي كما سرحان فى قافر الخلا=الي شاف له نشر مكاسيعٍ ذودها
يدور العشا ليلين ما ذاق له عشا=وأحرى ابعشا من نشر بدوٍ يرودها
على وليفٍ تل قلبي من الحشا=تلة جفولٍ تلت اللي يقودها
وحب الحبيب قد قهرني وذلني=كما ذل مسجون بسلاسل قيودها
قم يا نديبي وأرتحل قاسي العضا=جيب من التمرين كمل امعدوها
ما وردوه الا على شف طالب=من المنصع اللي كل آله بزودها
ميكنته لي شغلت كن صوتها=جرادٍ وضع في اللي تشكك برودها
إلي ديس بتروله زرق زرقه الحنش=يهيض غرامك لي تعلا نفوذها
عليه اربعه وسبير من صنع الاطلس=جدادٍ نوى ما رقعوا في جلودها
لي خذت يا مندوب لك كل حاجه= ولا حاجة تطلب الا في وجودها
توصل ديار القرم صالح أبو علي=نسل القروم ومن اكابر اجدودها
عليه سلم لي مع كل من حضر=عنده وخصه بالسلامات زودها
اعداد ما هبت شروق وذعذعت=واعداد ما قد هزت الرياح عودها
واعداد ما هلت قنوف من المطر=واعداد مادن الرعد في ركودها
تعطيه يا مندوب مني رساله=وشكيه الى من للشكايا سنودها
يابوعلي من له لزيمٍ شكى له=وللغير ما يبدي خفايا سدودها
الناس تخفي الحسد وتبين الرضا= ولاتنعرف صدقانها من حسودها
الروح يا صالح على ما انت خابر=رمتها الليالي من مفارق ودودها
اصبحت في ديره وخلي بديره= تشتت ليالي قد عدانا سعودها
وليف وداده غاشي القلب والحشا= ومحبته باتت عليها شهودها
يشهد عليها القلب من حرة الجوى=حتى العروق الناحله من جلودها
وعين الي من عسعس الليل ماغضت=ودموع عينٍ ضايلاتٍ حشودها
يابوعلي عطني كلام يسرني=وهذا وعجّل للشكيه ردودها
هذا وصلى الله على سيد الملا=اعداد ما هبت ذعاذيع نودها