يالله ياللي كل الارزاق بيده = رزق الملا ووحش الفلا وحوت الابحار
يا كافل خلقه ووالي عبيده = يا من له التدبير ما مدير الادوار
فرج علينا في السنين الشديده = والطف بنا فيما جرت فيه الاقدار
وابدل لنا حال العسر والنكيده = باليسر والتيسير يا خير مختار
واجعل ليالينا علينا سعيده = وأيامنا تزهي من الخير باثمار
منك الفضل أول وتالي تزيده = الحمد لك والشكر في كل ما صار
فضايلك جمّا علينا عديده = والخير كله في الذي انت تختار
بأمرك بدا خيرك وقادر تعيده = في قول كن تجري المقادير باسرار
راح الزمان اللي به النفس سيده = ترعى ثمر عشب الأماني والازهار
يوم المعايش بالمسره رغيده = وكل غني من فضل ربه بالايسار
والناس من كسب الفوايد مفيده = من كل صوب يجيك درهم ودينار
واليوم صاروا في حياة نكيده = جاهم زمان بين العاق والبار
وتقاطعوا فيه العضيد وعضيده = واستبخلوا عن صلة الرحم والجار
صار الشرا والبيع نقص وفقيده = وانتزعت بركة الصنايع والابحار
راعي البحر لو كان حصل سديده = ما مر صوب البحر يوم ولا سار
حيث ان فيه يحيد سكره شديده = فيه الغناه وفيه كاسات الامرار
متوزي الشطات ويداه بيده = ما بين مايات وآفات وآخطار
في الصيف واللازم ورده رديده = مقدار سعبع شهور في هم وافكار
يفرح إلي قفل ويحاتي مديده = وشتاه يتسول معاطيه محتار
والنوخذه يبغي الجديم ويديده = والسيب والغيص يتشكون الاضرار
لا قفلوا كل عطي له زهيده = والكل ما صلح من الغوص له كار
راعيه صابه وصف راعي النشيده = بيتين شعر قالها نسل الاخبار
وش جابني للغوص حال النكيده = اركس مع الديين في غب الابحار
قل الطهاره والصلاة الزهيده = وأمر الستر خله مغطى بالاستار
هذا السبب لي به تناقص مزيده = يمهل ولا يهمل تعالى للاشرار
ناس يكدونه لعينا السديده = وناس يكدونه لاجل لعب وقمار
هذا على هذا تقاشر مديده = وكثر المعاصي والربا وقل الاطهار
يا صاح خذ مني نصيحه وكيده = واعمل بها واترك رديين الاشوار
أول تحفظ بالستر عن عبيده = لعن الذي ناظر ومنظور بابصار
واستح من الله والرقيب وعتيده = الأملاك ثم الناس والعار والنار
والثانيه حفظ الطهاره أكيده = نصف الصلاة الطهر في نص الاخبار
والثالثه صل الصلاة الحميده = في وقتها بشروط وفروض واذكار
واركان واطمئنان فيها بر كيده = واخشع بها واخضع وطمن بالانظار
واسأل إله العرش رزقك يزيده = وارفع كفوفك بالعشيه والابكار
والرابعه آمن وصف العقيده = لا تعتقد في خلف طرشه ولا زار
لا تجعل لمولاك ضد ونديده = اهل اعتقاد الزار في النار كفار
فلا مانع للشي والله مريده = ولا معطي والله مانع ومختار
خله سنادك في الرخا والشديده = ماشي غير الله نافع ولا ضار
مفاتيح علم الغيب خمسه عديده = ما يعلم بها غير علام الاسرار
الرزق عنده والفضل نستزيده = سبحان من لا له شبيه ولا انظار
لله حكمه واردة في عبيده = أغنى وأفقر وابتلى بعسر وايسار
والخامسه اذكر عذابه ووعيده = يوم الخلايج شاخصين بالابصار
يوم به النيران تزفر شديده = على الطغاة أهل المعاصي والانكار
ولأهل التقى تزلف جنان عديده = مستانسين بظل عرشه والاستار
واقبل وصاة من نصيح مفيده = عسى الله يمنحنا معك طول الاعمار
ولازم على هذا سنين مديده = ما دمت حي بخير فالوقت غدار
ما ينفعك مالٍ وجاه تريده = يا غير تقوى الله في سر وجهار
وختمي صلاة الله ختام النشيده = على النبي والآل والصحب الاخيار