يالله ياللي كاشف ضر أيوب = يا منجي ابراهيم من نار نمرود
يا مجيب دعوة يونس بسر الغيوب = في بطن حوت باسفل البحر ماجود
يا ناصر موسى وجاعل له دروب = باليم وامسى من يعاديه مضهود
يا جامع ما بين يوسف ويعقوب = عقب البطا ومكابد احزان ونكود
يا قابل التوبة من اللي لك يتوب = يا غافر الزلات يارب الوجود
يا جابر أجبر كسر ضلعين من صوب = الايسر مع رضوض الرئه بالحشا زود
يجري على المخلوق ما كان مكتوب = باللوح ما يغني الحذر عنه وصدود
لو كنت في دربك لك السيد مقضوب = يخطا عليك يجيك جاهل ومقرود
من كل مهبول من العقل مسلوب = يسوق ما عنده انتباه ولا ركود
أعطوه رخصه بالوساطة قضى النوب = وامسى يسوق بدون ترتيب وحدود
والبعض جاهل ما بلغ سن الوجوب = من دون رخصه حدّه الجهل والزود
ليت الذي يخطي ينهى ولا يتوب = يحرم من الرخصه حياته ولا يعود
تقل الحوادث بالممرات ودروب = ما يقال ذا مصوب وهذاك مفقود
وأمر القدر ما يحط حجه لمصيوب = نؤمن ولا نهمل تعاليم وقيود
يا حافظ احفظ واكفنا كل مكروب = والطف بنا يا صاحب الفضل والجود
الموميان وكل هاذيك الحبوب = نرجي عسى ان الله يجعل بها فود
أنت الذي نرجيك في كل ماجوب = حبل الرجا بك دايم الدوم ممدود
عجل علينا بالشفا واغفر ذنوب = عبد شكا لك يرتجي منك مقصود
تشفيه وتعافيه من كل الكروب = عفوك وفضلك دايم ذاك ماجود
رحمتك ارجي من عملنا على الدرب = من لاذ بك ما رد خايب ومطرود
أعطيتنا من فضلك عقول وقلوب = سمع وبصر في كل الاحوال محمود
منا يقع لا شك تقصير ونتوب = نرجو العفو فضل علينا به تجود
نسألك حسن الخاتمة خير مطلوب = هي منتهى المنوى بها الخير وسعود