يا ركب عوجوا روس الانضا بالارسان = بالهون لا هنتوا ولا صابكم ضيم
مقدار ما يفرغ من بيوت الافنان = مغرم غريم مولع بالمناظيم
ما هوب حباب لها لاجل الاثمان = يبغي مكافا أو مجازا وتكريم
معروف قدره دون هذا وله شان = قصده إلى جا موجب فيه تلزيم
يرخص بغالي الشعر لا شاف ميدان = كله لعينا موفين الملازيم
يا ركب لا رضتوا عقب ذاك باحسان = جدوا السرا من فوق كوم علا كيم
هجن بواطن من ذرا ساحل عمان = حيل مكاليف نفايا مراديم
قود سماحيج تناسيه ظبيان = خيرة ركاب وللسرا ضمر هيم
يا ركب سيروا وقطعوا الخد طرشان = مني تعنوا وقصدوا طيب الخيم
بكتاب حاوي من غلا الدر مازان = من قلب مخلص به تحيه وتسليم
يا ركب ما تبغون وصف ونيشان = ما هو خافي بيت جود وتكريم
بيت بهجر لا اختفى الغير لك بان = بيت بنا بالجود ساسه ابراهيم
بيت القصيبي مقصد لكل انسان = ناس دعوا للناس حق ومراسيم
ياما وياما فرجوا كر واحزان = كم التجوا به في الليالي معاديم
جعله محل عامر طول الازمان = واللي بسوحه مرغدين بتنعيم
زانه وزاده بالفعل ذرب الإيمان = حر تمكن به حوى زود تعظيم
جاه وغناه وحوض روض وبستان = من كل خلق زاكي نال تفخيم
سعد القصبي ملتقى كل لهفان = من صكته الأيام أو ليم أو ضيم
ينصا ويلقى لانصا البيت مشتان = منصى وملفى حين وقت الملازيم
يقوم بحمول الثقيله ويشتان = من كان مثله ينذكر بالثنا مديم
شهم كريم وكل ما جاه له عان = مورد زلال وعذب مروي ظما الحيم
يبذل كل ما حاز يا خوان = من كان مثله حاوي المجد ماليم
كن مثل ابو خالد جمال للاوطان = الله يديمه في معزة وتكريم
يالله عسى جود من السحب هتان = يسقي محل حل هاطل الديم
يا سعد ساعدك الولي عالي الشان = بالدين والدنيا والأخرى بتقديم
منتب بخيل لا ولا يقال منان = أيضا وتعرف حالة الناس وفهيم
هذي حلاة المال لا خير يا فلان = في اللي عليها زاد قفل وتحكيم
يالله دخيلك م القطيعة وحرمان = ما نيب ذاكر عيب سلمان وسليم
يا هيه يا جاهل قدر فعل الإحسان = خذ واستمع مني وصايا بتفهيم
بادر بفعل الخير في سر وإعلان = لا يكون همك جمع الاموال وتهيم
لامن حصل دنيا ودين وصفطان = أبشر تنال وتدرك العز المديم
واعمر زمانك بالتقى وزود الإيمان = ترى هذي أسباب حسن الخواتيم
صلاة وتسليم عدد كل ما كان = تغشى النبي وآله وصحب له مديم