هاض ما بالقلب من شعر بديع = صفه استاد خبير بالنظام
يشتريه ان بيع لك ما يبيع = غالي عندهم ولو جا له مسام
نبذله للكفو ونكافئ صنيع = مستحق المدح يمدح ما يضام
كم صديق في الخليج وكم ربيع = لا عنيت وجيت شفت الاحترام
كل منهم بالمراجل لي فزيع = حافظ للعهد ويراعي الذمام
عندهم ما حناب نحتاج لشفيع = بس يكفينا المواجه بالسلام
يا فهد يا خوي يا محب الجميع = يا ولد راشد ويا نسل الكرام
من نشيت وكنت بالدنيا رضيع = لين هذا اليوم سيرك بانتظام
من حسن خلقك وطيبك لك نذيع = سمعة بالخير ما فيها ملام
ما نسينا ايام دلما ما تضيع = ذكرها محفوظ بالخاطر دوام
يوم كنا وكنت في روض وربيع = نجتمع صبح ومسا باحسن نظام
عاد سعد الحظ واصبحنا جميع = في مدينة بوظبي طاب المقام
عند احباب لهم شكل بديع = بالصخا والجود ما بين الانام
جعل يسقي دارهم غيث مريع = من سحاب الجود من رب الدوام
في قطر لك منزل رحب وسيع = فيه ناس تقوم بالواجب شمام
يوم جينا سعيد حيانا سريع = ناب عنك وقام باللازم تمام
نسال الرحمن مولانا السميع = يلهمه رشده ويهديه بسلام
لي ذكرنا سعيد ما ننسا الربيع = صاحب الهمات في ليل الظلام
راشد الي مرشد سامع مطيع = جملك هذاك في شرق وشام
نرتجي له يرتفع شان رفيع = ما يجي دونك إلى جال الكلام
زد من الاحسان دامك تستطيع = قدم لنفسك عمل خير امام
لاتحسب الطيب بالطيب يضيع = لا ورب البيت ضايع في اللئام
من زرع بارض نجيبه له تريع = ريعها بالخير موجود دوام
البخل والشح بالدنيا شنيع = صاحبه ما ينال في الاخرى المرام
ما مثل الاحسان يا نعم الشفيع = ينس الانسان يجعل له احترام
ها الحياة بها متاع للمطيع = يا بخت من له بها صيت ومقام
يصنع المعروف ويكافي الصنيع = لو بشربة ماي كافاها شمام
الصفا فيها كما زهر الربيع = تغتنم قطفه قبل ياتي السهام
حط تقوى الله لك حصن منيع = واطلب الله لي ولك حسن الختام
تجتمع واحبابنا معكم جميع = في جنان الخلد في دار السلام
والصلاة اختام هالنظم البديع = للنبي والآل واصحاب كرام