عزيل من بالبيض قلبه تعلّق = مشطون في شف العذارى وممحون
حاول عزا عنهن وغرب وشرّق = ما فاده اطبوب وهم له يداوون
لو يبصرونك من هجرهن تحرّق = مروا عليك وكنهن ما يعرفون
اقسى من الصخر الصخر يتفلق = وكم صخرة منها خرج ما تسمعون
لا من ولا المخلوق غيره يترفّق = لكن ذا في شرعهن غير مسنون
ناشدتهن بالله وعهد موتّق = عصر تقضا بين فاتن ومفتون
قالوا ابد ما نعرفك لا توهّق = منتب لنا شكل ولا احنب لك انكون
لا يا صواحب يوسف اللي مسرّق = من كيد كن شاف العزاري مع الهون
انكرتن ناللي كان سر مطبّق = بصندوق صدري ماله الناس يدرون
ما تذكرون ايام فيها نتذوّق = نقطف ثمر ما كان من ذيك الغصون
غض طري ما لمس قبلي مغلّق = ورد وخوخ وتين رمان مكنون
ونشرب بكاس من رحيق تدفّق = الذ واحلا من العسل به تسمحون
قالوا حلم ليل عرض لك وطرّق = وظنيت انك واعي يوم تجنون
ان كان عندك شاهدين تفرّق = ما بين حلم وعلم جبهم يحضرون
ما كنت أحسب حساب واشهد واوتّق = إشهودكم منكم عليكم يشهدون
الحاجبين ومع جبين تشرّق = عينين نجلاوين بالقلب يسطون
ومبيسمات وقذلة تحت مفرّق = وانف كما الهندي تحالاه مسنون
قالوا بعد قلت الذوايب تفرّق = تحت الشطايا معثكلات يحنون
وخصر شكى منه الحقب لو يضوّق = مع ذا ومع ردفين حامل له متون
وساقين مدموجين منهن تعوّق = خلخال ماله ينسمع صوت مدفون
قالوا قنعنا بس قبل نتفرّق = ببحور شعر تسحر القلب بفنون
محد من العشاق مثلك توفّق = لاوصاف مع كثرة قصيدك يكثرون
لك منزل محد نزل به تحقّق = اغلى من صبي النظيرين بالعون
لامر ذكرك يوم قمنا نتشرّق = خطر علينا نخاف الاعدا يفطنون
اخذ الحذر والخوف وبنا ترفّق = ليا بحبك ياحشا القلب يدرون
تامن ولو سد المغربل توهّق = حذراك منهم لا تغفل لو يغفلون
جعل الذي بين الحبايب يفرّق = يبلا بنار الجفا والصد حتى يكفون