شكيت ما فاد التشكي ولاسر = صبري على نفسي ولا الناس يدرون
يجري على المخلوق شي مقدر = واللي مقدره الولي لازم يكون
باصبر على طول الجفا وآتصبر = لين الفرج ياتي من الله لي عون
هذا الدهر حالات خير مع شر = مر هوا مزعج ومر ترى سكون
وش في يدي يا صاحبي وش بقدر = قبلي بلي أيوب وآدم وذا النون
يوسف مع يعقوب صفوه تكدر = وموسى وهارون ابتلاهم بفرعون
حتى خليل الله ذاك المطهر = نمرود وش سوى به اشكال وفنون
وخاتم جميع الأنبياء يوم حذر = قومه تعادوا له وهو سيد الكون
كل صبر لأمر المولى ما تضجر = حيث الفرج عنده جريب ومضمون
والله مابي كل من جا ومن مر = بي والله اللي عنده القلب مرهون
ما ينوخذ الإنسان جهل على غر = يا زين تكفا لا تصدق بي ظنون
خذني بحق وارفق وانظر تبصر = واعرف قدر خل من سنين مامون
خل الشكوك ووسوسة ذاك الاقشر = ابليس مع نفسك تراهم يواشون
انت الخبير بحالتي والله اخبر = بيني وبينك خافي السد مكنون
واذكر زمان بالتصافي لنا مر = ما حلاه يوم الواش ميس ومغبون
أنا الذي لك صافي ما تكدر = لامن بدا لك لازم صرت ممنون
امجاهد نفسي ولا قيل قصر = مدي اللوازم والخلايج يشهدون
دونك من الهجران قلبي تفطر = انت بقصر مطلق وانا بقيد مرهون
عينك تنام وعيني الليل تسهر = انت الغني وانا لك اليوم مديون
لو ماني اكتم عبرتي لاتحدر = شفت المدامع فوق خدي يهلون
رق الحسود لحالتي يوم فكر = وعداي صاروا يرحموني وياوون
كيف ان محبوبي علي يتكبر = ويمر ما كنه يراني بالعيون
يا زين بس من الطغا لا تجبر = تندم الي من شفت ما عفت بالعون
كم ظالم من زود ظلمه تحسر = شاف العقوبه وامتحن صار مغبون
ارجي ان الله يهديك وتبصر = تصفي لمن لك صافي دوم في الكون
وازكى صلاة مع سلام مكرر = تغشى النبي وآله وصحبه له يكون