أمس الضحى في غرفة النوم وافيت = زول الحبيب والتقاني خياله
رحبت به ساعة لفاني وهليت = ترحيبة الغايب إلى جا عياله
فيا مرحبا ما طافت الناس بالبيت = ويا مرحبا عد الدهر مع لياله
باللي قباله منوتي لاتمنيت = ومشاهده يبري الحشا من علاله
ساعة أشوفه لو مريض تعافيت = وامسيت من شوفه بخير وسهاله
فياليت نومي سبعة أعوام يا ليت = حيث ان خلي فيه ارخص وصاله
زال العنا عن مهجة القلب واصحيت = واستر مفجوع برى البعد حاله
لا شفت زوله نور عيني تحاييت = وان صد عني الحال واعزتاله
احيا إلى شفته والى صد انا ميت = لكن بين الناس أبدي الجماله
فلولاي أخشى قولهم ويش سويت = ومجاذب ما بين قالوا وقاله
ما كان انا عن سيد روحي تعزيت = وأظهرت أني سالي عن داله
ريم رماني بقوس لحظه وقاسيت = هم على قبلي يزيد اشتعاله
لولاه أنا ما قلت من ذا الشعر بيت = حاشا ولاخطت يميني رساله
الله عسى من لامني فيه ياشيت = تصفج من الحسرة يمينه شماله
اصخا لي بروحه وانا بروحي أصخيت = ما بيننا صار القسم بالعداله
محلا امنادمة صويحبي لا تمخليت = أحلى من السكر بصافي زلاله
ينساج بالي مع حبيبي إلى جيت = لو بالحشا هم لك الله زاله
شوفه يساوي الهند والسند مع هيت = والشام والبلدان شرق وشماله
طفل تشادي غرته مشعل الزيت = والا كما بدر بدا في كماله
نذر علي ان جيت داره وحاذيت = بيته ولاقتني بشاير جماله
لاصوم لله واحرم ان جيت بالبيت = خمسة عشر يوم لعينا جلاله
لامن ترجوا الناس خير ترجيت = انه يدوم بحال خير وسهاله
من دعوة بمظلم الليل ناديت = يا عالم بالحال واللي جرى له
أنك تلم بشملنا عقب تشتيت = يا واحد ما خاب عبد يساله
يا زين عقبك ساعة ما اسفهليت = ما كني إلا فوق جمر الملاله
أصبح على هم وهم إلى امسيت = وان جن ليلي زاد همي عداله
اكفيت حال حل بي يوم قفيت = حال لك الله ما يقايس وباله
من زود ما بي يا ريش العين هليت = دمع على الوجنات عجل انهماله
يا زين انا بك من قديم تشقيت = متولع بك يوم عصر الجهاله
والله ما نسى عشرتك لو تناسيت = حبك بقلبي ثابت لا محاله
عفت العذارى عقب شخصك ومليت = والا انت مالي عن ودادك ملاله
انت الذي باقصى الضماير توزيت = والغير ما بالعين إلا خياله
لا تحسبني ساعة عنك سجيت = لا والذي ترجي الخلايق نواله
انك بقلبي دايم الدوم حليت = لك منزل بالجوف محد يناله
لاهب غربي الهوى قلت انا ليت = ينقل جدا مضنون عيني رساله
وان هبت النكبا من الوجد ونيت = ونت دنيف راح حاله وماله
صلاة ربي عد رمل السباريت = على النبي واصحابه الغر وآله
وعداد ما في المبتدى قلت واوفيت = زول الحبيب والتقاني خياله