ما بسمن ذا الجفا يا روح = ما كنني لك على الملّة
دونك قليبي غدا مجروح = شف ذا صوابي أنا ملّه
لا واسفا يا عديل الروح = حطيت باقصى الحشا علّه
جد لي زمان وانا مطورح = من ذا الهجر صاربي خلّه
أمشي بليا عقل وآروح = شبه المقيد بلا زلّه
ما لي عوين سوى ذا النوح = ودموع عيني لها هلّه
يا ليت باب الوصل مفتوح = مع جادل اللي زها دلّه
نقضي الغمايض معك يا روح = قب الجفا حالي يحلّه
زين المحيا لطيف الروح = ردفه إلى قام لي تلّه
وامجدّله بالزباد يفوح = فوق الردايف غدا فلّه
لحظه بسيف المنايا يثوح = ذبحي وقتلي إلى سلّه
مقبول زينه وهو مملوح = تزهي خدوده بلا كلّه
زاهي جماله بلّيا سروح = كافيه حسنه مع دلّه
ما دام انا والغضي مبجوح = وان صدّ كني على ملّه
راعي الهوى دايم مفضوح = لو تاب يرجع على الملّه
تلقى الدّلايل عليه تلوح = يامر وينهى على حلّه