عزيت نفسي والتعزي ممله = واعزتا للي مفارق خليله
والله ما ودي بفرقا الأخله = ساعه من أيام الحياة الطويله
سر يا رسولي بالرسالة وقل له = خلك من الهجران ضايع دليله
دمعه على الخدين دايم يهله = يبكي من فراقك نهاره وليله
شفج عليك صويحبك متوله = ما اعتاض في الخلان غيرك بديله
قالوا تسلى قلت حالي يسله = هم من فراقه عسى الله يزيله
ادواي بين اشفاه نهله وعله = من مبسم طعم العسل سلسبيله
من صاحب تعلق روحي فدا له = عبد وما تملك يميني فهي له
الجادل اللي حاز قلبي وحله = وأودعت نفسي لاجله دليله
غرو غرير بزمة إصباه فله = ماخذ على الخفرات زود النفيله
لاجا يقوم ردوف قده تتله = تشكي الونا منها خصور نحيله
والى تبدى قلت بدر الاهله = اشرق وشعشعت الدياجي شعيله
وان هز رمح القد سيف وسله = من حام حول حماه واعزة له
يطعن ولا ياوي بحال يحله = لا شاف مصيوب تزايد غليله
عقب الجفا نلت الوصل منه كله = وحظيت بوصاله وحصلت نيله
واشفيت قلب حط لي فيه عله = وابردت كبد من فراقه عليله
وبتنا وخواطرنا معه مسفهله = وابديت وابدى لي كثيره وقليله
عاتبتني والعتب شرع ومله = ولا خير في من لا يعاتب خليله
عتبك على عيني وراسي محله = واشوف منك العتب حسن وجميله
والخل ما يشره على غير خله = لا شاف عقب العدل صد وميله
مقبول لو ما رمت ذنب وزله = عفا الله عن ما فات جانا بديله
حبك تملك ضامري واستحله = ما ينمحي رسمه ولا فيه حيله
غيرك من الخلان نفسي تمله = والا انت وسط القلب ساكن نزيله
يا نور عيني يا سراج المحله = يا ريف قلبي بالبساتين المحيله
ان كان تبغي تملك القلب كله = سر في رضاه وراع عدله وميله