يالله يا جابر عظام الكسارى = يا والي بأمره تصاريف الاقدار
انت الذي زابنك ما يستدارى = يا مخرج ذا النون من لج الابحار
انك تسرع بالفرج واليسارا = وتزوح هم بالحشا وقد النار
عزي لقلب من محانيه طارا = وامسى يخفق بالجناحين محتار
مر يمين ومر ياخذ يسارا = يجذبه دولاب الفكر كلما دار
عقب الوقاعه صار ماله قرارا = يمسي كما يصبح يهم وتذكار
مثل الخلوج اللي مضيع حوارا = يرزم كما ترزم عشيات وابكار
عليك يا سلطان كل العذارى = يا مورد الخدين يا ريم القفار
ريم على ريم الفلا له فخارا = عجاب لعاب بالالباب سحار
من شاف زوله زال عقله وحارا = وامسى يقاسي منه ليعات وافكار
مقرب وصوفه من ظبي الزبارا = لولا الفتور اللي بجفنه والانوار
يا سيد الخفرات ما لي اصطبارا = ما نيب والله عنك يا زين صبار
انت المنى وانت الغنى واليسارا = وأنت الذي عني مزيل للاكدار
ساعة أشوفك عني الهم سارا = ما اغبط غيري لو ملك كل الامصار
المال عقباه ذاهب للدمارا = يفداك غالي المال والحال والدار
ما اختار غيرك لو عطيت الخيارا = لو جمعت لي البيض ما غيرك اختار
أحبك وأحب اللي لحبك يغارا = واعاف من عافك ولو هو غدا جار
حتيش لو زعلوا هلي والقصارا = حبك جمال وحب غيرك غدا عار
حبك بقلبي يوم حنا صغارا = ما ينمحي رسمه ولو صار ما صار
لولاك حاربت الوطن والديارا = ما كان اسكن بين موشي وهذار
اللي سعوا بفراقنا واستدارا = كثر الحكي ومرافعات بالاخبار
رب السما ياخذ لي اليوم ثارا = منهم ويفزع للذي ما له انصار
فرقاك يا سيد البني المهارا = ما هي هوى لي لا وعلام الاسرار
شفني من الفرقا عيوني سهارى = اسهر إلى نام الخلي وقت الاسحار
وش حيلتي مالي عليك اقتدارا = بيني وبينك حال موشين واشرار
مثل الذي ضامي وحوله تجارى = عيون ولكن دونها بيشوف الاخطار
يا ليتني وياك ولف نتبارا = في بر ولا بحر ولا على اكوار
هجن هجاهيج اعراب ابكارا = ونسير في بر الهوى كيف نختار
ونقضي منانا في هوانا سكارى = ما دام غصن العمر زاهي بالاثمار
لا نختشي فرقا ولا نخاف عارا = ايضا ولا نحاتي مصاريف واسعار
وآمن لولا الله ثم المدارا = من حاسد يفرح بشي إلى صار
لا انصاك ليل وارد أو نهارا = وابرد غليلي منك واقضي للاوطار
واسلم ودم لو شفت منك انتكارا = الله يحفظك من تصاريف الاقدار