عزيل يا قلب غدا بوادي التيه = داعي غرامه بيح السد وافضاه
الأول احسب الحب هين وبخفيه = واثر الهوى ما يقدر الصب يكناه
من هام به ما عنه شي يعزيه = قل عزتا للي بلي به عزاه
ما يهتني بزاد ولا نوم راعيه = والعين منه بكل زول مشقاه
قلبي يحب الزين ويحب طاريه = والزين محبوب لدى الناس رؤياه
والزين من زانت وفاقت معانيه = ويعد كامل كان زانت حلاياه
مثل الذي في كل قول انا اعنيه = لا واهني نفس تهنت بلاماه
شمس طلع نوره وفايق اهاليه = فاقت على كل العذارى مزاياه
يحي ثمر قلبي وتعشب مجاريه = لا من نظرته ساعة رامي غطاه
ويهل دمعي فرق الاوجان جاريه = لا من خطر يوم على القلب طرياه
حرام ما في الناس احد يشاديه = إلا بحور العين يوجد له اشباه
لا عاد يزري بالقمر نور خديه = والشمس تخجل لا تبدا محياه
مخلوق هو من نور والنور كاسيه = جل الذي صور جماله وسواه
حلفت لو بالعين ياطا برجليه = منها تشكا ما شكت من وطاياه
غض النهد مياس الاعطاف ما فيه = عيب سوى قل الوفا والمصافاه
ريم نفور عبث محلا تغليه = خص إلى من رمت وصله ولاماه
حلو التغطرف والغوى ما يخليه = والمزح طبعه والطرب من سجاياه
أغار لا من شفت احد يحاكيه = حتى ولو هو من هله أو دناياه
يسقي بوصله زرع قلبي ويحبه = ويهيف لا منه نوى لي مجافاه
جعل السعد وياه تكثر لياليه = وأيام وصله ما تكدر بفرقاه
كاتم وداده في ضميري ومخفيه = من خوف حساد بالاقوال تشناه
حتى باسم السيد ما نيب اناديه = الا بخفيه كان ما من مخاشاه
هو ريف روحي هو حياتي وانا فيه = ما طيع قول احد من الناس وارضاه
يرتاح قلبي له ويفرح بطاريه = ويزول همي لا تمخليت وياه
أحب من حبه وأعادي معاديه = واغضب إلى من غضب ورضاي لرضاه
إلا الهجر هذاك مقدر أقاسيه = مهواه لو هو صاحبي كان يهواه
عبد أنا مملوك ما بين أياديه = إن راد بيعي أو عتقني فانا افداه
أشوف أمره طاعة والسعد فيه = ومخالفه يخلف هوى من تبلاه
مدري متى سيد العذارى باوافيه = واحظى بشوفه ساعة لا عدمناه
حتى ابين حالتي له واراويه = حال جرى لي يا ملا بعد فرقاه
لا يحسبني عنه سالي وناسيه = لا والذي صور جماله وانشاه
عييت وانا من زمان أداريه = اشوف مالي حظ عنده ولا جاه
لكنني ما نيب ميس وساليه = أرجي عسى وصله يجيني مفاجاه
ما ييس المهجور من وصل غاليه = والعبد ما ييس من الطاف مولاه