أنا أشهد ان الحب بلشه وسبه = ومسكين ياللي منه ما شرب له كاس
بارد مزاج القلب تركبه وكبه = ما هو مع العالم ولا عنده احساس
هلباج همه بس بطنه يدبه = نوم الضحى له عادة بين الاغراس
ما به من اللي بي من الخردله حبه = ما جاه ما جاني من دقاق الالعاس
يا ليت ربي ما بلاني بحبه = ويا ليتني ما كنت أعرفه من الناس
الله بلاني به وحبه مسبه = لاهوب من شكلي ولا هولي اجناس
بلوى بليت بحب سيد الأحبه = الجادل اللي بزمة صباه مياس
من زود ريعان الصبا فيه شبه = كالمهرة اللي طقها الذول تحتاس
والا كما غصن يتمايل بخبه = عقب المطر جاله من النود نسناس
ومضمر يشكي السلب زود قبه = بين الردايف والحشا شبر بقياس
قلبي تعلق به صغير وحبه = ياخذ عليه من الهوى جبين نوماس
واتلا التوالي قطني وسط غبه = لجات وبحور من الهوى مالها ساس
لاجيت باسلي عنه وادله واكبه = واترك وداده واسفهه زين الالباس
عرض علي وحط في القلب شبه = مثل التماس الكهربا بجنس حساس
يسحرني بعينه ومزحه وطبه = يودع جروحي تشتعل فوق مقباس
لا واحلا لو نجتمع وسط قبه = أو خيمة مضروبة فوق الاطعاس
واسج وادله بالمنادم أربه = يبرد حشا قلب به ألفين هوجاس
غديت من كثر التوهجس مسبه = حسيبه الله صرت عرضه للاعماس
ما مجيب دعوة يونس وسط غبه = في بطن حوت بحوت ما ضاع الاحساس
دعاك دعوة مخلص حق ربه = وانجيت عبدك يا إلهي م الاتعاس
تمحى وداده من ضميري وجبه = وتفكني ما من ترى رحمتك ياس
وتعيضني خطوى فتاة محبه = حلوة شباب بغاية العمر نبراس
وأعيش معها بعيشة مستحبه = واقضى تلايا باقي العمر بايناس
عدني أشم الطيب واطرب واحبه = وافزع مع الفزاع بظهور الافراس
قبل الشباب تشال عمده وطنبه = ويحل بي من قلة الحيل هوجاس