عزيل من يمسي ويصبح ولا يشوف = خل يوده أو حبيب يصافيه
محروم من لام المحبين مشفوف = ما يهتني بالنوم من دون غاليه
لازاد ما بالقلب صفقت بكفوف = وافظيت سد طالما كنت مخفيه
عصر تقضى لي ولا فيه مصروف = يالله عسى تصفي بواجي لياليه
لا عدت لها شايف ولا هوب مشيوف = وقتك على غير المصالح تقضيه
وش لذة اللي ما يرى زين الوقوف = عنده ولا يسمع كلامه حواليه
ونيت ونات الذي فارق الشوف = أوونة المقطوع من دون اهاليه
عليك يا غروزها بزين ووصوف = واطباع وانواع الحسن جمعت فيه
يقال لي في الناس زين ولا شوف = مثله حشا ما شفت أحد يشاديه
كامل تواصيف وتعازيل وردوف = هاضم حشا ومعزل جل منشيه
بالزين مذكور وبالحسن ماصوف = الله عطاه وكمّله في معانيه
نزه المساعي ما وطا مدنق عوف = صاين من المنقود عرضه وحاميه
وياه لي ولف خصيصه ومعروف = عصر تقضت بالتصافي لياليه
بيني وبينه مغنم الود منصوف = مر يوفيني ومر اوفيه
ومعسكر بين المعاليج والجوف = مسمار حب في حشا القلب مخفيه
قلبي بحب مورد الخد مشغوف = ولاحد من الخفرات دونه يسليه
معطي على هذا مواثيج وحلوف = ما حب غيره كثر حبه واراعيه
أحيا على وصله زمان كما تشوف = وأموت من صده وكثرة تجافيه
والله لولا محاذر الناس والخوف = من حاسد يفرح بسدي ويفضيه
لاجيه عاني تالي الليل واحوف = وانهب حسين الدل من بين اهاليه
حتى ولو دونه حراريس ووقوف = حجاب وابواب عن الناس تحميه
باقرا عليهم آية السد واطوف = والا حبيبي ذاك مرخص لغاليه
حتيش لو قالوا لي الناس مشحوف = الله خبير بسر قلبي وما فيه
ما خاف وارجى غير ربي ولا شوف = غيره لي معين أخافه وارجيه
مذهب غرامي عند الاحباب معروف = نزه ولا بالشين تذكر معانيه
كل العذارى عاهدني بمحلوف = عصر الصبا ما ينقض العهد راعيه
محبين لي وانا محب ومالوف = راضي بما سووا ولا ناب شاكيه
يا ناس خلوني مع الزين متلوف = خلوا الفتى اللي مبتلي في بلاويه
انتوا خليين وانا لي معه شفوف = متولع قلبي ولا اقدر أعزيه
الشوف قصدي ليس جوف على جوف = الا الذي بالشرع هذاك نبغيه
يالله عسى اني اليوم مانيب مشفوف = من وصلهم آمين قولوا معي إيه
يصخف لحالي كل محبوب ويروف = والقلب يبلغ كل ما كان ناويه
صلوا عدد ما هل وبل من قنوف = على النبي والآل والصحب يتليه