أصبحت ماخوذ بلا حق مسروق = وين الثوير ووين أهل الحميا
ما من صديق يفهم العلم ماثوق = أبدي بغاياتي وهو به كفيا
كان الهوى له قاضي ياخذ حقوق = تكفون دلوني أشاكي شويا
خصمي من البيض الرعابيب غرنوق = خذني من اريام الجوازي ظبيا
بلطف وترحيب مع زين منطوق = ومراجعات اقوال هرج خفيا
لا هوب لا عجل ولا هوب مطفوق = يلوي بلولاب المودات ليا
خذني وقفا بي ولا قال مرفوق = بحما واخاف يصير شي عليا
متعود ينهب هل العشق بالبوق = ياخذ ويزبن في مكان عليا
ما هوب من اللي تاصله سبق النوق = لا درهمت بالسير صبح وعشيا
حلفت مابي حب من يدخل السوق = ولا بي هوى من لا اهتواني وعيا
ولا حب من يمشي على كل طاروق = سالك من دروب الخطا درب غيا
بي حب من اسمه عن الناس مغلوق = يذوب قلبي لا دعوا له سميا
شمس الضحى كنه إلى شع بشروق = وان جا الدجى بدر الدجى به تليا
العين عين الوحش والعنق مفهوق = والا الردايف تطوي الثوب طيا
حلو الشباب معزل الوسط غرنوق = غصن كما موز على جال ميا
حوله ترى العشاق صرعى من الشوق = يذبح ويقتل لا دنا منه حيا
مزاح لعاب زها جيده الطوق = محبوب مقبول على كل زيا
يا ليت منهو عنه ماهوب مفروق = دب الدهر وياه صبح وعشيا
ساعات وصله تنقضي كنها بروق = وايام هجره شيبتني صبيا
يدني ويبعد كل حين له رنوق = حيال متفنن نبيه ذكيا
يسلك مع العقال بفنون وطروق = ويلعب على الجهال حين شويا
والكل منهم يحسب انه هو الشوق = واللي بقلبه ذاك شي خفيا
أحد نراه وننظره باطرف الموق = وأحد بوسط القلب ساكن هنيا
يبغي الهوى صنديد سره بصندوق = ماهوب طفج عجل غر غبيا
حيذور تقطع غبة وسط زاروق = عليك بالمركب إلى من تهيا
سافر وخاطر واعرف انك ترى فوق = موج البحر تحتك مسوي دويا
ما نيب متفدي ببرقا ولا روق = ولا بالذي شاف القمر والثريا
حالي ومالي فدوة له ترا سوق = عن ما بقى يكفيه زين المحيا
ما حاجه نزعل على شانه خلوق = خلي عزيز النفس عن ذا غنيا
صلاة ربي عد ما لاحت بروق = تغشى النبي وآله وصحبه سويا