قال الذي بالحب قلبه مبتلي = خذ له زمان في المهامه مطول
متولع في حب عذبات اللما = القاتلات الصايبات المقتل
المترفات المتلفات بحبهن = السالبات قدودهن الميل
مضمرات غانيات خرّد = تلع الرقاب مكملات بالحلي
ذا لي زمان في هواهن مشتقي = متولع ما طعت قول العذل
من تابع الخفرات ما سمع العذل = قلبه معاهن دايم متهبل
ما أحلى منادمة الغواني في الهوى = أحلى وألذ من الرحيق السلسل
كم سجة لي في الهوى معهن = يوم ثمار الوصل داني مظلل
أيام أنا دهري مساعد بالذي = ابغي وسوق الحظ سوق معتل
تمضي الليالي ما عرفت احسابها = وانا بنعيم داله به ذاهلي
متمتع بوصال طفل شادن = ريّان عوده والقوام مغزّل
أخشى عليه من الحواسد لا بدا = خصّ إلى جا بالدلال مكمّل
كامل ولا له في الأنام مماثل = سبحان رب جاد به متفضل
حوريّة وسم الجمال بوجهها = من شافها لزم لها يتذلل
خود كعود الخيزرانه خصرها = والا الردايف كالكثيب المعتل
حازت حسن يوسف وزادت بالغوى = وبنغمة تنسي اسحاق الموصل
لو هي كما يوسف تباع وتنشرى = ارخصت أنا بروحي ومالي وبهلي
أسهى وأغيب لا نطحني مفرع = كاسيه جعد فوق متنه مسبل
أحيا بشوفه واستعيش بزورته = وانسى الهموم إلى تبسم واقبل
كم ليلة بتنا معه في سجة = والواشي عنا في منامه غافل
يسقيني بكاس المحبة مصخر = من ما ثناياه العذاب الذبل
فلا بدا نور الصباح واقبلت = عقب الظلام بروق فجر تشعل
ودّعته الله بالأمان وقلت له = ليا بهجرك يا حبيبي تطول
واليوم اشوفه خان عهدي وانكرن = حتى بسلامه صار يشح ويبخل
مدري تغلي أو تكبر مقصده = أو هي خيانة بالمحب المبتلي
أشكي غرامي له وهو متغافل = عني إلى من قلت قال انك خلي
أحلف له ويقول حلفك باطل = من ذا يصدق عاشق متحيلي
يا زين ما تذكر ليالي اللي مضت = بالطيب معكم في الزمان الاول
وين العهود اللي جنابك قالها = أيام أنا وياك في ربع خلي
يومك تقول اني بحبك صادق = أرضيك لو تغضب علي وتزعل
واليوم ما كني أعرفك في الملا = لا شفتني عني تصد وتجفل
ما هوب حق ذا الجفا يا صويحبي = الله حسيبك ما تخاف من الولي
ردت وقالت ما نهجرك يا فتى = حاشاك بالهجران ما تستاهل
لكن ذا العدوان حالوا بيننا = كل علينا سل سيف مصقل
حسبي عليهم هم سعوا بفراقنا = شتوا بشملنا وابعدوا بالمنزل
ابدي صدود لا نظرتك بينهم = أبغي يقال انه غرير مغفل
وانا وحق الحب والعهد الذي = تذكر فلا خنتك ولاني بفعل
له قلت أنا أفعل ما تريد إلا الجفا = تراك منتب لا فعلت محلل
يا بو ردوف لا مشى تشكي الونا = منها خصور هاضمات نحل
يا منتهى قصدي وغاية مطلبي = سرع علينا بالوصال وعجل
ما لي بغيرك لو صفا لي رادة = البيض ما يسوون حبة خردل
ما اتعيضني فيك الغواني كلهن = لو هن صفن لي وارخصن لي بما غلي
كانك تشوف مواصل مني لهم = تراي ابغي بعض همي ينجلي
نذر علي إن جا البشير بوصلكم = لارز رايات البشاير وابدل
ما كان عندي من نفيس وغالي = كله رضاً لك يا ربيع الممحل
وان كان ما تسمح تراني تالف = صبري تقضى يا غزال العندل
وإن كان لا هذا ولا ذا فالرجا = والظن في المولى الكريم المعتل
يجمع شملنا يا الحبيب بسرعة = من قبل لا تشمت علينا العذل
ثم الصلاة على النبي وآله = والصحب ما صلى المصلي وهلل