يا الله ياللي ترتجي الناس حسناه = يا واسع فضله علينا وجوده
إنك تلم الشمل من عقب مقصاه = والمنتزح لديار حيه تعوده
والله ما ودي بطول المجافاه = كنى على جمر تزايد وقوده
العين عيت بالكرى لا تهناه = والكبد طيب الزاد ما هي تروده
والنفس تاقت توق حر لمرباه = حام وشهر في الجو صعب ردوده
كم ليلة قضيتها بآه ويلاه = واسهرت من حولي وحارب رقوده
لا من ذكرت الخل والولف وياه = خطر على قلبي يتصرم عموده
حاولت عيت تحتمل طول فرقاه = نفس على الهجران غصب محدوده
بي علة ودواي شوفة محياه = والناس تنعت لي الفواكه بروده
عزي لمنهو حايم تم بضماه = على الموارد ما بعد شرب ذوده
لا من بغى له صاحب يسج وياه = عداه من دونه صروف تذوده
تمضي الليالي ما تهنا بلا ماه = لا من ورد حين صدر عن وروده
مر مع الاحباب بانس ومسلاه = نقطف ثمر الازهار من زان عوده
ومر على العيرات سير وتسراه = ومر على فلك تبنى ندوده
بين الحسا وعمان نفسه مشقاه = هذا وذاك الكل نفسه تروده
خل جرى بيني وبينه مصافاه = وصل على وصل تتابع سعوده
ياما سقاني شربة من ثناياه = وياما جعل لي وسادة من زنوده
في سجة مع ندمة من حكاياه = ليل قفا ليل عسى الله يعوده
وانقدت له قود الصعب عقب معصاه = واصبح زمام القلب عنده يقوده
النور ياضي من محاسن محياه = والورد غب الطل حمرة خدوده
يبعد بغاياته ولا تعرف اقصاه = مزاح بلسانه ونفسه نقوده
يعلب على قلوب العرب يوم تنصاه = ويوهق المسكين لاجا حدوده
والكل منهم يحسب انه هو أمناه =واللي بقلبه ما درى به حسوده
كم واحد جاهل بغاه أو تمناه = يوم عقل اكفاه خجلة ردوده
ما نيب والله ناسي من سجاياه = لطفه وترحيبه وصادق وعوده
ما اسج لو هون سج عني ولا انساه = والهقوه ان الحب عنده بزوده
لو يقسي احيان علي فيه ما واه = عارف وداده والضماير شهوده
أهوى ويهواني وانا أهواه برضاه = ما تستوى بالغصب نفس ودوده
كم واحد يبغي الوصل ما بغيناه = النفس ما هي كل شخص تروده
مخصوص من تهوى تخصه بمهواه = والجنس حق الجنس تطرب جنوده
ما كل زول تشوف عيني تملاه = ما تصد صوب اللال ترجي وروده
من زود حبي له اراعي دناياه = واللي على حبله وجملة حشوده
ما كان يهوى صاحبي والله اهواه = واللي يكرهه صاحبي ما اروده
يتوق قلبي كل ما طفت بحماه = تشتاق له نفسي وعيني تروده
متعاهدين بالمواثيج وياه = ما يفضي بسدي ولا افضي سدوده
يا يجيب لي طارى ولا اجيب طرياه = وان غبت يحفظني وانا احفظ عهوده
والله لو هو من ورا الشام لانصاه = وأجيه لو هو نازح من حدوده
كلّه لعينا شرهته والمداراه = لا يقول جافيني ومظهر صدوده
صلاتي وتسليمي على صاحب الجاه = محمد والصحب ما هب نوده